“Qlobal Bakı Forumunda çox əhəmiyyətli məsələlərə toxunulur” - AÇIQLAMA
Bildiyimiz kimi, martın 13-də Bakıda, "Gülüstan" sarayında Azərbaycan Respublikasının Prezidenti İlham Əliyevin himayəsi altında və Nizami Gəncəvi Beynəlxalq Mərkəzinin təşkilatçılığı ilə "Dünya düzəninin yenidən düşünülməsi: Çağırışların fürsətə çevrilməsi" mövzusunda XII Qlobal Bakı Forumu işə başlayıb. Bu tədbir Azərbaycanın beynəlxalq nüfuzunu artıran mühüm platformalardan biridir.
Mövzu ilə bağlı Crossmedia.az-a açıqlama verən deputat Pərvanə Vəliyeva ilk olaraq bildirib ki, Qlobal Bakı Forumu artıq ənənəyə çevrilmiş, bu il 12-ci dəfə təşkil olunan bir platformadır: “Digər beynəlxalq platformalardan fərqli olaraq, burada siyasi, ictimai, sosial və mədəni məsələlər müzakirə olunur. Məsələn, Davos Forumu iqtisadi məsələlərə, Münxen Təhlükəsizlik Konfransı isə təhlükəsizlik məsələləri üzrə müzakirələrə həsr olunub. Lakin Qlobal Bakı Forumu bütün bu mövzuları əhatə edir və iştirakçılar siyahısına baxdıqda onların prezidentlər, baş nazirlər, nazirlər və digər yüksək səviyyəli şəxslər olduğunu görmək olar”.
Deputatın sözlərinə görə, forumun işinə dünən start verilib və açılış mərasimi Gülüstan sarayında Prezidentin iştirakı ilə baş tutub: “Cənab Prezident çıxışı zamanı bir çox əhəmiyyətli məsələlərə toxunub. Bu platforma dünya mediasının iştirakını təmin edərək, Azərbaycanın dünyada baş verən yeni geosiyasi yerdəyişmələr və yeni çağırışlar barədə mövqeyini təqdim etməyə imkan yaradır. Burada beynəlxalq proseslərə Azərbaycanın baxışı, xarici siyasətinin istiqamətləri, regionda baş verən hadisələr və ölkəmizlə bağlı bir çox məsələlər müzakirə olunur. Dövlət başçımızın fikirləri ilə bütün dünya ictimaiyyəti və mediası bu məsələlərə dair geniş məlumat əldə edə bilib. Azərbaycanın iqlim dəyişiklikləri sahəsində əldə etdiyi nailiyyətləri və iqlim diplomatiyası da forum çərçivəsində müzakirəyə çıxarılıb. Bundan əlavə, forumda Ermənistanla sülh müqaviləsi üzrə danışıqların danışıqlar və açıq qalan məsələlər barədə məlumat verilib”.
P. Vəliyeva vurğulayıb ki, prezident bəzi xarici media qurumlarının Azərbaycanın beynəlxalq nüfuzuna xələl gətirmək üçün apardığı qarayaxma kampaniyalarından bəhs edib: “ABŞ və Fransa mediasında yayımlanan neqativ məqalələrin cəhdlərinə baxmayaraq, Azərbaycan bu uğurlu beynəlxalq tədbiri yüksək səviyyədə keçirib. Azərbaycan Respublikasının Prezidenti çıxışında COP29 zamanı Makron tərəfindən aparılan qarayaxma kampaniyalarına və boykot kampaniyalarına toxunub. Eyni zamanda, ABŞ-dəki media resurslarında, daha çox keçmiş ABŞ administrasiyasının təsiri ilə “Washington post” , “Associated Press” və digər platformalarda, COP29 öncəsi Azərbaycanda iştirakın boykot edilməsi ilə bağlı məqalələr yayımlanıb. Həmçinin, Fransanın "Le Monde" və "France 24" kimi xəbər portallarında qarayaxma kampaniyaları aparılıb. Bu məqalələr Azərbaycanın beynəlxalq nüfuzunu və imicini zəiflətmək məqsədi daşısa da, nəticədə bu cəhdlər uğursuz olub. Azərbaycan böyük bir uğurla beynəlxalq tədbirə ev sahibliyi edib”.
Deputat bildirib ki, Prezident İlham Əliyevin qeyd etdiyi kimi, bu tədbirdə 197 ölkədən 77,000 iştirakçı qeydiyyatdan keçmiş, 70-ə yaxın dövlət və hökumət başçısı qatılmışdır: “Ermənistan isə COP29-u boykot edən və iştirakdan imtina edən yeganə ölkə olub. Bu qərar, Ermənistanın beynəlxalq öhdəliklərini yerinə yetirməməsi ilə bağlı idi. Onlar iqlim üzrə yeni maliyyə hədəflərinin razılaşdırılmasında birbaşa iştirak etmədilər. Bununla belə, ABŞ və Fransadan olan nümayəndələr də daxil olmaqla digər ölkələrdən gələn nümayəndə heyətləri tədbirdə aktiv iştirak edərək danışıqlar prosesinə öz töhfələrini verdilər.
Prezident çıxışında Avropa İttifaqının regiondakı missiyasına da toxunub və bu missiyanı lazımsız hərbi kəşfiyyat fəaliyyəti kimi qiymətləndirib. O bildirdi ki, Azərbaycan tərəfinin bu missiya ilə bağlı əldə etdiyi kəşfiyyat məlumatları mövcuddur”.
Forum çərçivəsində müxtəlif müzakirələr baş tutub. Millət vəkilinin dediyinə görə Milli Məclisin üzvləri də panel sesiyalarda iştirak ediblər: “İtaliyadan gələn media nümayəndəsi Xarici İşlər nazirinə İtaliya-Azərbaycan münasibətləri barədə sual ünvanlayıb. Həmçinin Çin Xalq Respublikasından gələn nümayəndələrin çıxışları maraqla qarşılanıb. Onlar ABŞ-nin hazırda tarif siyasətinə dair məsələlərə toxunaraq vurğuladılar ki, əgər bir ölkə çoxtərəflilik müqavilələrində partnyor kimi çıxış edirsə, həmin partnyora qarşı belə müharibə tərzində münasibət göstərilməsi qəbuledilməzdir. Yunanıstandan da maraqlı bir təklif səsləndirildi - keçmiş baş nazir bildirdi ki, hazırda geosiyasi dəyişikliklərdən danışırıq, lakin eyni zamanda geoiqtisadi yerdəyişmələr də müşahidə olunur. Dünyada bəzi regionlarda, xüsusilə Afrika və qlobal Cənubda, rəqabət artır. Biz diqqətimizi bu faktora yönəltməliyik, çünki dünya iqtisadiyyatının 80%- dən çoxu qlobal Cənubun payına düşür və onlar davamlı olaraq dünya iqtisadiyyatının inkişafına töhfə verirlər. Buna görə də, bu forumda Afrikadan olan nümayəndələrin iştirakı təmin edilməli və onların dünyaya baxışları öyrənilməlidir”.
“BMT-nin islahatlara ehtiyacı və çoxqütblü dünya nizamının formalaşması Forumda müzakirə olunan əsas mövzular sırasında idi. Azərbaycan da regional əməkdaşlıq çərçivəsində "Türk Dövlətləri Təşkilatı", Mərkəzi Asiya və Yaxın Şərq ölkələri ilə əməkdaşlığa xüsusi önəm verdiyini bildirib. Bu kimi maraqlı iddialar irəli sürülüb. Həmçinin, BMT-də islahatların həyata keçirilməsinin vacibliyi, yeni reallıqlara və çağırışlara cavab verə biləcək bir mexanizmin hazırlanmasının zəruriliyi bir daha vurğulanıb. Əgər əvvəllər çoxtərəfli yanaşma və multilateralizm təbliğ edilirdisə, hazırda dünyada qütbləşmə və çoxqütblülük müşahidə olunur. Azərbaycan da çıxışlarında qeyd etdi ki, multiregionallaşma yeni reallıqlar yaradıb. Məsələn, Azərbaycan Türk dövlətləri təşkilatları ilə, Mərkəzi Asiya ilə və Yaxın Şərq ölkələri ilə əməkdaşlıq edir, bu isə regional tərəfdaşlıqlara daha çox üstünlük verdiyini göstərir. Hal-hazırda bu çərçivədə yeni regional tərəfdaşlıqlar yaranır. Buna görə də, BMT bu reallıqlara cavab olaraq yeni tədbirlər həyata keçirməli, islahat mexanizmləri işləyib hazırlamalı və tətbiq etməlidir”,- deyən P.Vəliyeva fikrini yekunlaşdırıb.
Nəzrin Salmanova
13:33 14.03.2025
Oxunuş sayı: 9762
