Ərdoğan: “Türkiyə Suriyanın sabitliyinə təhdid yaradan hücumları pisləyir”
Türkiyə Prezidenti Rəcəb Tayyib Ərdoğan Nazirlər Kabinetinin iclasından sonra jurnalistlərə açıqlama verib. O, Türkiyənin Suriyanın birliyi, sabitliyi və ictimai sülhünə qarşı yönəlmiş hər cür terror və zorakılıq aktlarını qətiyyətlə pislədiyini bildirib.
Ərdoğan qeyd edib ki, Suriya hökumət qüvvələrinin müdaxiləsi ilə bölgədə vəziyyətin nəzarət altına alındığını görsələr də, gərginlik hələ də davam edir. O, Türkiyənin bu proseslərin ölkəyə təsirini minimuma endirmək üçün lazımi addımlar atdığını vurğulayıb.
“Suriya məsələsində yalnız məzhəbi və ya etnik yanaşma nümayiş etdirənlər kor fanatizmin tələsinə düşüblər. Biz İraq, Suriya, Livan və regiondakı digər ölkələrdə heç kimin mənşəyi, dini və ya məzhəbi ilə maraqlanmırıq”, – deyə Ərdoğan bildirib.
Türkiyə Prezidenti həmçinin qeyd edib ki, Suriyada günahsız insanların öldürülməsinə uzun illər göz yumanların indi Türkiyəyə tənqid yönəltmək haqqı yoxdur.
Crossmedia.az saytı xəbər verir ki, Ərdoğan həmçinin Azərbaycan Prezidenti ilə görüşü barədə də danışıb: "Bu strateji əməkdaşlıq, Türkiyə və Azərbaycanın qardaşlıq bağlarını daha da möhkəmləndirərək, regionun enerji təhlükəsizliyinə mühüm töhfə verəcək". O, Iğdır - Naxçıvan qaz kəməri vasitəsilə Naxçıvanın təbii qaz ehtiyaclarının ən azı 30 il ərzində tam şəkildə təmin ediləcəyini vurğulayıb.
Eyni zamanda o, gələcəkdə bu sahədə yeni təşəbbüslərin reallaşdırılacağını da qeyd edib.
Zeynəb Yunuszadə
09:21 11.03.2025
Oxunuş sayı: 9314
