"Yüksək məsuliyyətli və tələbkar müəllimlər sevilmir"- Ekspert
Adətən deyirlər ki, ali təhsil müəssisələri özü bir cəmiyyətdir. Bu cəmiyyətin də özünəxas qaydaları, nizam- intizam qaydaları var. Onlara əməl etmədikcə təhsil prosesində iştirak edən tərəflər, o cümlədən müəllimlər, şagirdlər və valideynlər arasında narazılıq yaranır. Tərəflər bu və ya digər səbəbdən bir - birilərini ittiham edirlər. Bu isə son nəticədə təhsilin keyfiyyətinə təsir edir.
Bu barədə Crossmedia.az-a danışan təhsil eksperti Kamran Əsədov qeyd edib ki, məktəbin əsas missiyası bilik vermək və tərbiyələndirməkdir:"Lakin bu gün məktəblərdə formalaşan sosial sifariş yalnız ali məktəbə qəbul olmağı hədəfləyir. Bu yanaşma isə məktəb üçbucağının – direktor, müəllim, şagird və valideyn münasibətlərinin təhrif olunmasına gətirib çıxarır.
Direktor obyektiv, şəffaf və tələbkar olduqda hər üç tərəfin – müəllimlərin, şagirdlərin və valideynlərin narazılığına səbəb olur. Çünki sistem səmərəliliyə deyil, ənənəvi rahatlığa köklənib. Müəllimlərdən ciddi nizam-intizam və peşəkarlıq tələb olunduqda, bəziləri bunu artıq yük kimi qəbul edir. Şagirdlər üçün ciddi təlim və nəzarət psixoloji gərginlik yaradır. Valideynlər isə məktəbi yalnız imtahanlara hazırlıq mərkəzi kimi gördükləri üçün tərbiyə və intizam məsələlərində müəllimlərə və direktora təzyiq göstərirlər".
O bildirib ki, eyni vəziyyət nümunəvi müəllimlər və nizam-intizamlı şagirdlər üçün də keçərlidir: "İbtidai siniflər istisna olmaqla, yüksək məsuliyyətli və tələbkar müəllimlər həmkarları tərəfindən sevilmir, hətta bəzən kənarlaşdırılır. Sonuncu dərsə qədər qalan, məktəb qaydalarına əməl edən, dərslərə davamiyyət göstərən şagirdlər belə bəzən arzuolunmaz hesab edilir. Səbəb isə məktəbin kollektiv yanaşmadan uzaqlaşması və hər kəsin fərdi maraqlarını qorumağa çalışmasıdır.
Bu problemlərin kökündə məktəbdə əsl təhsil və tərbiyənin prioritet olmaması dayanır. Sosial sifariş ali məktəbə daxil olmaq üzərində qurulduğu üçün məktəb əsl mahiyyətini itirir. Nəticədə tərbiyə, şəxsiyyət formalaşdırılması, yaradıcı və tənqidi düşüncə bacarıqlarının inkişafı arxa planda qalır. Halbuki məktəb yalnız ali məktəbə qəbul üçün deyil, həyatda uğur qazanmaq üçün bilik və bacarıq qazandırmalıdır. Bu yanaşmanın dəyişməsi üçün ilk növbədə təhsil sistemində yeni meyarlar müəyyən olunmalıdır. Məktəbin uğuru yalnız məzunlarının ali məktəbə qəbul faizi ilə ölçülməməli, onların həyatda, cəmiyyətdə və iş həyatında uğurlu olub-olmaması ilə dəyərləndirilməlidir. Əks halda, məktəb formal bir quruma çevriləcək, tərbiyə və təhsil prinsiplərini itirəcək və yalnız imtahan mərkəzi kimi fəaliyyət göstərəcəkdir".
KƏNAN NOVRUZOV
13:00 10.03.2025
Oxunuş sayı: 796
