Zelenski üzr istəmədi: ABŞ-dakı gərgin görüşdən sonra ilk müsahibə
“Mən prezident Trampa və Amerika xalqına hörmət edirəm, lakin səhv bir şey etdiyimizi düşünmürəm”, – deyə Ukrayna lideri üzr istəməkdən imtina edib.
Crossmedia.az xarici mənbələrə istinadən xəbər verir ki, Ukrayna lideri Vladimir Zelenski Ağ Evdə ABŞ prezidenti Donald Trampla hadisəli görüşdən sonra Fox News telekanalına müsahibə verib.
Respublikaçıların “hörmətsizlikdə” ittiham etdiyi Zelenskidən Trampdan üzr istəyib-istəməyəcəyi soruşulub. “Mən prezident Trampa və Amerika xalqına hörmət edirəm, lakin səhv bir şey etdiyimizi düşünmürəm”, – deyə Ukrayna lideri üzr istəməkdən imtina edib.
Görüş zamanı nə baş verdi?
Cümə günü Tramp və Zelenskinin Vaşinqtonda görüşü zamanı gərginlik artdığından, Ukrayna üçün nadir torpaq minerallarına dair saziş imzalanmayıb.
Ukrayna liderinin səfəri Oval kabinetdə Tramp və vitse-prezident J.D. Vansın iştirakı ilə keçirilən görüşdən sonra xaos və qarşıdurma ilə nəticələnib.
“Biz eyni tərəfdə olmalıyıq və ümid edirəm ki, prezident Tramp da bizimlə eyni tərəfdə olacaq. Bu, Putini dayandırmaq üçün çox vacibdir”, – deyən Zelenski, “Ukraynanın Rusiyaya münasibətini dəyişə bilmərəm. Mən bunu istəmirəm. Onlar bizi öldürürlər”, – deyə əlavə edib.
Sensasiyalı görüş nələri üzə çıxardı?
Bu görüş Ukrayna ilə ABŞ arasında ciddi fikir ayrılıqlarını ortaya çıxarıb.
Söhbətin tonu ilk dəfə ABŞ-ın vitse-prezidenti J.D. Vans Zelenskiyə Ukraynanın döyüşləri davam etdirmək üçün kifayət qədər canlı qüvvəyə malik olmadığını dedikdə dəyişib.
Ukrayna lideri isə “Siz Ukraynada deyilsiniz, bunu deyə bilməzsiniz. Gəlin və özünüz baxın”, – deyə cavab verib.
Zelenski Kiyevin israr etdiyi təhlükəsizlik təminatlarına ehtiyac olduğunu vurğuladığı üçün Tramp onun sözünü kəsərək “ABŞ-ın Ukrayna üçün artıq etdiklərinə görə minnətdar olmalısınız”, – deyib.
“Daha çox minnətdar olmalısınız. Əlinizdə kartlar yoxdur. Bizimlə kartlarınız var. Amma bizsiz, sizin kartlarınız yoxdur”, – Tramp əlavə edib. “Ölkəniz böyük bəla içindədir”, – deyə davam edərək bildirib: “Siz bunu qazana bilməzsiniz.”
Ukraynanın ABŞ-ın hərbi yardımı sayəsində 3 ildir özünü müdafiə edə bildiyini vurğulayan Tramp, “Hərbi texnikamız olmasaydı, bu müharibə iki həftəyə bitəcəkdi”, – deyib.
“Putindən eşitdiklərimə görə, üç gün ərzində”, – deyə Zelenski cavab verib.
Münhen Təhlükəsizlik Konfransı və mübahisəli saziş Fevralın 14-16-da Almaniyada keçirilən Münhen Təhlükəsizlik Konfransında ABŞ-ın Ukraynanın faydalı qazıntılarına dair təqdim etdiyi ilk saziş layihəsi müzakirə mövzusu olub.
İddialara görə, ABŞ bu layihədə Ukraynanın faydalı qazıntılarının demək olar ki, yarısını istəmiş, lakin bunun müqabilində heç nə təklif etməmişdir. Zelenski isə konfrans zamanı bəyan edib ki, o, bu saziş layihəsini rədd edib.
Zelenskinin mediaya reaksiyası
Ukrayna lideri gərginliyin artdığı anların mediada geniş işıqlandırılmasına reaksiya verib.
Danışıqların mediada işıqlandırılmasını dəyərləndirən lider bildirib:
“Məncə, çox fərqli dialoqlarımız olduğundan bu, yaxşı olmadı. Mediaya hər zaman açığam, amma çox həssas məsələlər var. İstəyirəm ki, tərəfdaşlarımız vəziyyəti düzgün başa düşsünlər, mən də hər şeyi düzgün başa düşmək istəyirəm. Bu, dostluğumuzu itirməmək üçündür.”
Zelenski həmçinin, son hadisəli görüşə baxmayaraq, Trampla münasibətlərin yaxşılaşa biləcəyinə inandığını qeyd edib.
Zəhra Ağayeva
15:00 01.03.2025
Oxunuş sayı: 10321
