Diaspor
Marneulidəki “Azərbaycan Evi”də Xocalı soyqırımı anılıb
Gürcüstanın Marneuli şəhərində fəaliyyət göstərən “Azərbaycan Evi”ndə Xocalı soyqırımının 33-cü ildönümünə həsr olunmuş “Xocalıya ədalət!” adlı fotosərgi və anım tədbiri keçirilib.
“Azərbaycan Evi”nin və AZƏRTAC-ın birgə təşkilatçılığı, Azərbaycan Diasporuna Dəstək Fondunun (ADDF) dəstəyi ilə keçirilən tədbirdə Azərbaycanın və Türkiyənin Gürcüstandakı səfirliklərinin əməkdaşları, ictimaiyyət nümayəndələri, din xadimləri iştirak ediblər.
Öncə şəhidlərimizin əziz xatirəsi bir dəqiqəlik sükutla yad olunub.
“Azərbaycan Evi”nin direktoru Məhəbbət İmanov çıxışında Xocalı soyqırımı barədə ətraflı məlumat verib. Bildirib ki, Gürcüstandakı soydaşlarımız faciə qurbanlarının xatirəsini hər zaman dərin ehtiramla yad edirlər.
Azərbaycanın Gürcüstandakı səfirliyinin müşaviri Kamal Xəlilov çıxışında Xocalı soyqırımının dünyada tanıdılması istiqamətində görülən işlər barədə danışıb. Qeyd edib ki, Xocalı soyqırımına ilk hüquqi-siyasi qiyməti Ulu Öndər Heydər Əliyev verib. Ümummilli Liderimizin 1994-cü il 1 mart tarixli Fərmanı ilə hər il fevral ayının 26-sı "Xocalı soyqırımı və milli matəm günü" elan olunub.
Azərbaycan dövləti Xocalı soyqırımına dünyada hüquqi-siyasi qiymətin verilməsi istiqamətində fəal iş aparır. Heydər Əliyev Fondunun vitse-prezidenti Leyla Əliyevanın başlatdığı "Xocalıya ədalət!" kampaniyası çərçivəsində artıq dünyanın 50-dən çox ölkəsinin parlamentində Xocalı faciəsi soyqırımı kimi tanınıb, bu istiqamətdə işlər davam etdirilir. Diplomat 2020-ci ildə Müzəffər Ali Baş Komandan, Prezident İlham Əliyevin rəhbərliyi ilə Azərbaycan Ordusunun torpaqlarımızı işğaldan azad etdiyini, bununla da şəhidlərimizin qisasının alındığını xüsusi vurğulayıb.
Türkiyə səfirliyinin məsul əməkdaşı Uğur Tahnal, Qafqaz Müsəlmanları İdarəsinin Gürcüstan nümayəndəliyinin rəhbəri Məhəmməd Şamilov, Gürcüstan Azərbaycanlıları Konqresinin sədri Hüseyn Yusubov faciə barədə fikirlərini bölüşüb, şəhidlərimizə Allahdan rəhmət diləyiblər, Xocalı əsilli Marneuli sakini Gülnaz Çıldırlı ana yurdu Xocalıda baş verənlər barədə acı xatirələrini bölüşüb.
Sonra Qaçağan kənd 2 saylı ictimai məktəbinin şagirdlərinin çıxışında Esmira Ələkbərlinin “Nəfəs fasiləsi” adlı hekayəsi əsasında hazırlanmış tamaşa nümayiş etdirilib.
Sonda şagirdlərə təşəkkürnamələr təqdim edilib.
10:54 27.02.2025
Oxunuş sayı: 11716
