Ankarada Xocalı Anım Muzeyində erməni təcavüzünün qurbanlarının xatirəsi anılıb
Ankaranın Kızılcahamam rayonunda yerləşən Xocalı Anım Muzeyində Xocalı soyqırımı qurbanlarının xatirəsinə həsr olunmuş anım mərasimi keçirilib. Azərbaycanın Ankaradakı səfirliyi yanında Azərbaycan Mədəniyyət Mərkəzi və Kızılcahamam Bələdiyyəsinin birgə təşkilatçılığı ilə reallaşan tədbirdə diplomatlar, yerli bələdiyyə rəhbərliyi, hərbi məktəb kursantları, yerli təhsil ocaqlarının məktəbli və müəllimləri və hər iki qardaş ölkənin ictimaiyyət nümayəndələri iştirak ediblər.
Tədbir iştirakçıları Xocalı qurbanlarının xatirəsini bir dəqiqəlik sükutla yad ediblər.
Kızılcahamam bələdiyyəsinin rəhbəri Süleyman Acar tədbiri açaraq vurğulayıb ki, Xocalıda ermənilər tərəfindən törədilən soyqırımı unudulmamalıdır.
“Keçmişini unudan şəxs gələcəyini itirmiş olur. Tarixin faciəvi hadisələrini xatırlamaq və gələcək nəsillərə ötürmək vacibdir. Bu, bizim borcumuzdur”, - deyə o söyləyib və Xocalı soyqırımını “bütün Türk dünyasının qəlbində dərin yara” adlandırıb.
Azərbaycanın Ankaradakı səfirliyinin müşaviri Eldar Əliyev tədbir iştirakçılarına tarixin müxtəlif dövrlərində xalqımıza qarşı törədilən cinayətlər barədə məlumat verib.
Diplomat azərbaycanlılara qarşı planlı şəkildə aparılan etnik təmizləmə siyasətindən, o cümlədən Qərbi Azərbaycanın köklü əhalisinin deportasiya dalğasından danışıb.
“Türkiyə və Azərbaycanın hər bir sakini nəinki Xocalını, hətta keçən əsrin əvvəllərində Anadolu və Azərbaycanda törədilmiş qanlı cinayətləri, erməni terrorizmini və 1915-ci il hadisələri ətrafında aparılan yalançı təbliğatı da unutmamalıdır", - deyə diplomat vurğulayıb.
E.Əliyev Xocalı sakinlərinin məhz azərbaycanlı olduqları üçün qətlə yetirildiklərini xatırladıb. “Soyqırımı aktının baş verdiyini hamıya çatdırmaq lazımdır. Xalqlarımızın düşmənlərinin maskalarını çıxarıb atmaq lazımdır”, - deyə o qeyd edib.
Bundan sonra məktəblilər Xocalı soyqırımına aid şeirlər oxuyublar. Xocalı abidəsinin qarşısına gül dəstələri qoyulub.
Tədbir iştirakçıları Xocalı Anım Muzeyini ziyarət ediblər. Burada onlara Ermənistanın Azərbaycan torpaqlarını işğal etdiyi dövrdə törətdiyi cinayətlər, o cümlədən 1992-ci ilin fevralında Xocalıda baş vermiş qanlı hadisələr barədə məlumatlar verilib.
"Xocalıya ədalət!" kampaniyasına dair guşədə Xocalı soyqırımını tanıyan ölkələrin siyahısı yer alıb.
Muzeydə, həmçinin ermənilərin azərbaycanlılara qarşı törətdiyi cinayətlərə dair kitabların toplandığı kiçik kitabxana fəaliyyət göstərir. (Azərtac)
08:45 26.02.2025
Oxunuş sayı: 920
