AZAL - məxsus təyyarə qəzası ilə bağlı şübhə: "Qazaxıstan Rusiyanın diktəsinə boyun əysə..."
Qazaxıstanın nəqliyyat nazirinin müavini Talqat Lastayev bildirib deyib ki, AZAL-a məxsus təyyarənin qəzaya uğraması ilə bağlı araşdırmalar çərçivəsində mütəxəssislər texniki ekspertizalar aparır, hökumət orqanları onların nəticələrini gözləyir.
"Hazırda ekspertizalar aparılır. Müəyyən texniki ekspertizalar vaxt aparır. Biz onların nəticələrini gözləyirik. Ümumiyyətlə qəzanı araşdıran müxtəlif ölkələrdən olan ekspertlər bir-biri ilə daim əlaqə saxlayırlar”, - nazir müavini vurğulayıb.
Lastayev qeyd edib ki, Qazaxıstanın Nəqliyyat Nazirliyi AZAL-a məxsus təyyarənin qəzaya uğraması ilə bağlı ilkin hesabatda əks olunmuş məlumatdan artıq artıq şərh verə bilməz.
O, təyyarə qəzasının araşdırılması üzrə komissiyanın bu ilin sonuna qədər təqdim ediləcək yekun hesabatını gözləməyi xahiş edib:
“Düşünürəm ki, bu iş çərçivəsində heç bir sirr yoxdur. Bu qəzanın araşdırılmasına görə məsul olan ölkə kimi, bizim üçün məhz obyektivlik və şəffaflıq ön plandadır. Bu, gələcəkdə belə vəziyyətlərin təkrarlanmaması üçün araşdırmanın aparılması zaman rəhbər tutulan prinsiplərdir”.
Nazir müavininin bu açıqlaması yeni şübhə və suallar yaradır. Əsas sual isə budur: Qazaxıstan vaxtı bikərəkdən uzadır? Belədirsə, səbəb nədir? Rusiyanln proseslərdə əli ola bilərmi?
Bu barədə Crossmedia.az-a danışan Milli Məclisin deputatı Fazil Mustafa bu ehtimalı istisna edib.
O, Qazaxıstan və Azərbaycanın münasibətlərinin yüksək səviyyədə olduğunu qeyd edərək, qəzanın araşdırılmasında süni maneələrin yaradılmasının ehtimal olunmadığını bildirib: “Qazaxıstanın bizimlə münasibətləri yüksək səviyyədədir. Ona görə də Moskvanın Astanaya təzyiqi ehtimalı azdır. Hər halda Qazaxıstan Azərbaycanın nə dərəcədə əhəmiyyətli tərəfdaş olduğunu bilir və rəsmi səviyyədə bizə böyük dəstək verir. Ümid edirəm ki, araşdırma obyektiv aparılacaq. Çünki bu, kiçik və gecikdiriləsi bir məsələ deyil. Əgər Rusiyanın təzyiqinə boyun əysə, bu, Qazaxıstanın imici üçün də yaxşı nəticələnməz”, – deyə deputat vurğulayıb.
Siyasətçi, araşdırmanın nəticələrinin obyektiv olacağına ümid etdiyini bildirib.
Məhəmməd Vəliyev
17:38 19.02.2025
Oxunuş sayı: 4525
