Türkiyə-Azərbaycan enerji sazişi: Yeni əməkdaşlıq dövrü başlayır
Türkiyə və Azərbaycan arasında qaz sahəsində əməkdaşlığa dair Hökumətlərarası sazişin təsdiqi ilə bağlı qanun layihəsi Türkiyə Böyük Millət Məclisinin müzakirə gündəliyinə daxil edilib.
Qanun layihəsinin parlamentdə baxılması Türkiyə Böyük Millət Məclisinin spikeri Numan Kurtulmuş tərəfindən təsdiqlənib.
Hökumətlərarası saziş Azərbaycan və Türkiyənin enerji sahəsində qarşılıqlı əlaqələrini dərinləşdirmək məqsədilə 2024-cü il mayın 14-də İstanbulda imzalanıb.
Yanvarın 16-da Türkiyə parlamentinin Xarici Əlaqələr Komitəsinin sədri Fuat Oktayın rəhbərliyi ilə keçirilən müzakirələrdən sonra qanun layihəsi ilə bağlı müvafiq hesabat hazırlanıb.
Komitə hesabatında Bakı–Tbilisi–Ərzurum qaz kəməri, Trans-Anadolu boru kəməri və Bakı–Tbilisi–Ceyhan neft kəməri də daxil olmaqla, Türkiyə və Azərbaycan arasında bir sıra uğurlu enerji layihələrinin həyata keçirildiyini vurğulayıb.
Saziş, həmçinin Bakı ilə Ankara arasında enerji sahəsində birgə investisiya layihələri üzrə əməkdaşlığı da nəzərdə tutur.(Trend)
17:09 16.02.2025
Oxunuş sayı: 13934
