Qaradağ seçki dairəsi üzrə növbəti treninqlər təşkil olunub
Yanvarın 29-da keçiriləcək bələdiyyə seçkiləri ilə əlaqədar dairə və məntəqə seçki komissiyalarının bütün üzvlərinin iştirakı ilə hazırlığın artırılması, seçki sahəsində bilik, bacarıq və işgüzar vərdişlərin təkmilləşdirilməsi, xüsusilə protokolların düzgün doldurulması istiqamətində 37 saylı Qaradağ seçki dairəsi dairə seçki komissiyasında növbəti treninqlər təşkil olunub.
Crossmedia.az xəbər verir ki, treninqlərdə çıxış edən 37 saylı DSK-nın sədri Azər Ələsgərov seçki dairəsi üzrə hazırda 37-si daimi, 3-ü isə müvəqqəti olmaqla 40 seçki məntəqəsinin fəaliyyət göstərdiyini qeyd edib. Bildirib ki, bu günə qədər seçki dairəsi üzrə 48 mindən çox seçici qeydə alınıb. Seçicilərin 492 nəfəri 80-100 yaşlı insanlardır. 74 nəfər isə ilk dəfə səs verəcək gənclərdir.
Vurğulanıb ki, Mərkəzi Seçki Komissiyası (MSK) tərəfindən məntəqələr bütün zəruri vəsaitlərlə təchiz olunub.
Ümumilikdə bələdiyyə üzvlüyünə 128 nəfərin namizədliyi qeydə alınıb. Namizədlərin təbliğat və təşviqatı üçün seçki dairəsinin ərazisində lazımi şərait mövcuddur. Belə ki, bütün seçki məntəqələrinə yaxın ərazilərdə təşviqat lövhələri quraşdırılıb. Bu günə qədər dairə seçki komissiyası tərəfindən 403 müşahidəçi qeydə alınıb.
Seçicilərin rahat və maneəsiz şəkildə seçki məntəqələrinə gələrək səsverməsi məqsədilə seçki məntəqələrində bütün şərait yaradılıb.
Treninq iştirakçılarına MSK tərəfindən hazırlanmış slaydların və əyani vəsaitlərin köməyi ilə səsvermə günü məntəqə seçki komissiyaları üzvlərinin rol və vəzifələri, səsvermə otağının təşkil edilməsi qaydası, seçki günü müşahidəçilərin hüquqları, səsvermə günü məntəqənin açılması və sair barədə məlumat verilib. Təlim iştirakçılarına bununla bağlı yaddaş kitabçası da təqdim edilib. 230 nəfərdən çox şəxsin iştirak etdiyi treninqdə dairə və məntəqə seçki komissiyalarının üzvlərinin sualları cavablandırılıb.
17:11 23.01.2025
Oxunuş sayı: 10865
