Azərbaycan və Pakistan orduları arasında "yol xəritəsi": Əməkdaşlıq güclənəcək
Azərbaycan və Pakistan arasında Təlimat sənədi imzalanıb.
Müdafiə nazirliyinin məlumatına görə, yanvarın 23-də Azərbaycan Ordusu Quru Qoşunların komandanının müavini general-mayor İlqar Lətifov ölkəmizdə rəsmi səfərdə olan Pakistan Silahlı Qüvvələrinin Hərbi Əməliyyatlar üzrə Baş Direktoru general-mayor Abdulla Kəşifin rəhbərlik etdiyi nümayəndə heyəti ilə görüşüb.
Görüşdə Azərbaycan-Pakistan arasında hərbi sahədə əməkdaşlığın cari vəziyyəti və inkişaf perspektivləri, həmçinin hərbi qulluqçuların bilik və bacarıqlarının daha da təkmilləşdirilməsi məqsədilə təcrübə mübadiləsinin aparılması üçün keçirilən birgə təlimlərin intensivliyinin artırılmasının vacibliyi vurğulanıb. Sonda Azərbaycan və Pakistan Qərərgah danışıqlarının keçirilməsinə dair təlimat sənədi imzalanıb.
Hərbi ekspert Üzeyir Cəfərov Crossmedia.az saytına imzalanan təlimat sənədinin Azərbaycan üçün əhəmiyyətindən danışıb:
“Azərbaycan və Pakistan ordusu quru qoşunları arasında hər zaman sıx əlaqələr olub. Pakistan ordusu çox böyük təcrübəyə malikdir. Pakistan ordusu bu təcrübəni praktik şəkildə ortaya qoyur. Azərbaycan imzalanan sənədlə, Pakistan ordusundakı yeniliklərdən yararlanır. Azərbaycan müdafiə nazirinin Pakistana, həmçinin Pakistan Müdafiə Nazirliyinin rəsmilərinin də Bakı bir sıra səfərləri olub. Tərəflər arasında imzalanan Təlimat sənədi 2025-ci il üçün "yol xəritəsidir". Bu sənəd çərçivəsində Pakistan və Azərbaycan ordusunun 2025-ci ildə birgə təlim və görüşləri mütəmadi hal alacaq”.
Ayhan Ağarzayev
16:39 23.01.2025
Oxunuş sayı: 6613
