Prezident İlham Əliyevin Davos görüşləri: Azərbaycanın beynəlxalq səviyyədə artan nüfuzu

Davos İqtisadi Forumu qlobal problemlərin müzakirəsi, beynəlxalq tərəfdaşlıqların gücləndirilməsi və strateji əməkdaşlıqların qurulması üçün ən əhəmiyyətli platformalardan biridir. Hər il dövlət və hökumət başçıları, nüfuzlu iş adamları, elm və mədəniyyət nümayəndələri burada toplaşaraq dünya gündəmindəki aktual məsələləri müzakirə edir və gələcəyə dair strateji addımlar atırlar. Bu il də Azərbaycan Davosda özünəməxsus diplomatik fəaliyyəti, aktivliyi ilə diqqət mərkəzində olub. Prezident İlham Əliyevin müxtəlif yüksək səviyyəli görüşləri və çıxışları ölkənin beynəlxalq siyasətdəki aktivliyini və strateji əhəmiyyətini bir daha nümayiş etdirdi. Davosda keçirilən görüşlər yalnız ikitərəfli münasibətlərin inkişafı ilə məhdudlaşmayıb, həm də qlobal problemlərin həlli üçün birgə yanaşmaların formalaşdırılmasına yönəlib. Prezident İlham Əliyevin strateji yanaşması, Azərbaycanın xarici siyasət prioritetlərini müəyyənləşdirir. Azərbaycan yalnız regionda deyil, həm də qlobal miqyasda mühüm diplomatik oyunçu kimi çıxış etməyə davam edir.

Prezident İlham Əliyev səfər çərçivəsində qarşı tərəflərin müraciətləri ilə bir sıra dövlət başçısı və şirkət rəhbərləri ilə önəmli görüşlər həyata keçirib. 

Deputat Vüqar Rəhimzadə prezident İlham Əliyevin keçirdiyi görüşlər, bu görüşlərin mahiyyəti ilə bağlı fikirlərini Crossmedia.az saytı ilə bölüşüb:

 “Prezident İlham Əliyev Dünya İqtisadi Forumunda iştirak etmək üçün İsveçrə Konfederasiyasında səfərdədir. Yanvarın 24-dək davam edəcək sayca 55-ci olan Forum bu dəfə “Ağıllı əsr üçün əməkdaşlıq” devizi altında keçirilir. Forum hazırkı dövrün əsas çağırışlarının müzakirəsində, birgə qərarların qəbul edilməsində mühüm paltforma kimi diqqətdədir.  Ənənəvi keçirilən Davos Dünya İqtisadi Forumunun hər bir iclasının mövzusu dövrün çağırışlarını özündə ehtiva edir. Xatırladım ki, ötən il 60-dan çox hökumət və dövlət başçısının, o cümlədən Avropa Komissiyasının, BMT, NATO, Dünya Bankının, Beynəlxalq Valyuta Fondunun, Avropa Yenidənqurma və İnkişaf Bankının rəhbərlərinin və qeyri-hökumət təşkilatlarının nümayəndələrinin iştirak etdikləri 54-cü Dünya İqtisadi Forumu “Etibarın bərpası” devizi altında keçirildi. Bu mühüm məqamı xüsusi qeyd etməliyik ki, iqtisadi xarakter daşımasına baxmayaraq, Davos Forumu dünya siyasətinə, beynəlxalq münasibətlərə ciddi təsirə malikdir. Forum dünyanın iqtisadi mənzərəsinin təqdimatında önəmli rol oynayır. Burada irəli sürülən yeni fikirlər, təkliflər qlobal iqtisadiyyata yeni istiqamətlər verir. Davos Forumu, eyni zamanda, iqtisadi güc mərkəzlərinin bir-biri ilə dialoqu və dünya ictimaiyyətinə hesabat xarakteri daşıyır”.

Deputat görüşlərin siyasi və iqtisadi əhəmiyyətini qeyd edib:

“Dövlət başçısı İlham Əliyevin ənənəvi keçirilən Davos İqtisadi Forumunun iclaslarında iştirakı, verdiyi müsahibələr, qarşı tərəflərin müraciətləri əsasında keçirdiyi görüşlər Azərbaycan həqiqətlərinin, qlobal məsələlərin həllində tutduğumuz mövqeyin təbliğində əhəmiyyətli rol oynayır.  Prezident İlham Əliyev Forum çərçivəsində qarşı tərəflərin müraciətləri əsasında Latviya, İsrail, İraq, prezidentləri, eləcə də “OliverWyman Group”, “The Goldman Sachs Group Inc.” şirkətlərinin və “DP World” şirkətlər qrupunun rəhbərləri ilə görüşlər keçirib. Bu görüşlərdə ikitərəfli əlaqələrin inkişafı, sözügedən şirkətlərin ölkəmizdəki fəaliyyətinin perspektivləri, Şimal-Cənub və Şərq-Qərb nəqliyyat dəhlizlərinin yaratdığı imkanlar barədə müzakirələr aparılıb, Azərbaycanın regional nəqliyyat qovşağı kimi rolu xüsusi vurğulanıb, mümkün əməkdaşlıq istiqamətləri müzakirə olunub. Şübhəsiz, Forum çərçivəsində müxtəlif sektorlarda fəaliyyət göstərən xarici şirkətlərin rəhbərləri ilə keçirilən görüşlər həmin şirkətlərlə əlaqələrin qurulmasına, qarşılıqlı əməkdaşlığın gücləndirilməsinə, eyni zamanda, Azərbaycanın iqtisadi inkişafına öz töhfəsini verəcək. Bu baxımdan Davos İqtisadi Forumu Azərbaycanın uğurlarının bütün dünyaya çatdırılmasında önəmli rol oynayır. Qarşı tərəflərin müraciətləri əsasında keçirilən bu görüşlər Azərbaycanın dünyada artan nüfuzunun və Prezident İlham Əliyevə yüksək etimadın göstəricisidir”.

Parlamentari bildirib ki, Davosda Azərbaycanın diplomatik zirvəsi həm siyasi, həm də iqtisadi sahədə geniş perspektivlər vəd edir: “Prezident İlham Əliyevin liderliyi ilə aparılan diplomatiya, Azərbaycanın gələcək inkişafına və beynəlxalq arenadakı mövqeyinin daha da güclənməsinə zəmin yaradır. Bu proses yalnız ölkəmizin milli maraqlarının təmin olunması ilə kifayətlənmir, həm də beynəlxalq miqyasda sülh və sabitlik üçün mühüm töhfələr verir.

Ayhan Ağarzayev