Səhiyyə

Yeni infeksiya var: Səhiyyə Nazirliyi açıqlama verdi

Son zamanlar Azərbaycanda yeni bir infeksiyanın aşkar edilməsi ilə bağlı xəbərlər cəmiyyətdə geniş müzakirələrə səbəb olub. Bu hadisə, xüsusilə infeksiya haqqında məlumatsızlıq fonunda yaranan qorxular və şayiələr səbəbilə, əhalinin narahatlığı artıb. İnsanlar arasında ölkədəki xəstəxanaların dolduğu və səhiyyə sisteminin bu vəziyyətə hazırlıqsız olduğu kimi şaiyələr səsləndirilməkdədir.

Bu cür fikirlərin düzgün olub-olmamasını aydınlaşdırmaq, infeksiyanın yaratdığı potensial risklər və səhiyyə sisteminin hazırlığı haqqında daha dəqiq məlumat əldə etmək məqsədilə, Səhiyyə Nazirliyinin mütəxəssis-eksperti, infeksionist Təyyar Eyvazova müraciət etdik. İnfeksionist Crossmedia.az saytının suallarını cavablandırıb.

T.Eyvazov, həm infeksiyanın ölkədə yaratdığı epidemioloji vəziyyət, həm də bu halların qarşısını almaq üçün görülən tədbirlər barədə ətraflı məlumat verib.

-Yeni virus və ona yoluxma ölkə üzrə hər hansı epidemioloji risk yaradırmı?

-Bu infeksiya əsasən 2022-ci ildən etibarən müxtəlif dünya ölkələrində yayılmağa başlayıb və Azərbaycanda təsdiqlənmiş ilk hadisədir. Virusun yayılma xüsusiyyətlərinə əsasən deyə bilərik ki, bu infeksiya ölkəmiz üçün hər hansı bir epidemioloji risk yaratmır.

-Bu cür halların qarşısını almaq üçün hansı tədbirlər görüləcək?

-Bu cür halların qarşısının alınması məqsədilə artıq 2022-ci ildən Tədbirlər Planı hazırlanıb və icra edilməkdədir. Həkimlərimiz xəstəlik haqqında təlimlərə cəlb olunub və infeksiyanın aşkarlanması üçün kifayət qədər laborator imkanlar mövcuddur.

-Başqa halların aşkarlanmasının qarşısını almaq üçün hansı epidemioloji nəzarət tədbirləri görülür?

-Müalicə əsasən simptomatik olsa da, ağır xəstələr və ya ağırlaşma riski olanlarda, həmçinin təmasdan sonrakı profilaktikanın aparılması üçün antiviral preparatlar ölkəyə vaxtında gətirilib. Əhali bu barədə mütəmadi maarifləndirilir.

-Səhiyyə sistemi bu cür hallara nə dərəcədə hazırdır və əlavə resurslara ehtiyac varmı?

Səhiyyə sistemi bu hallara tam hazırdır və əlavə resurslara ehtiyac yoxdur. Əlavə olaraq, həkimlərimizin təlimləri və müvafiq dərman preparatlarının ölkəyə gətirilməsi təmin edilib.

-Cəmiyyətdə müxtəlif şaiyələr yayılır, insanlar qorxuya düşüblər. Xəstəxanalarda artıq yerin qalmadığı deyilir. Bu fikirlər nə dərəcədə düzgündür?

-İnsanlar arasında heç bir qorxu yoxdur. Bir gün ərzində ən ağır infeksiyadan belə xəstəxanalar dolmaz. Bu səbəbdən yayılan şayiələr əsassızdır və səhiyyə sistemi vəziyyəti tam nəzarətdə saxlayır.