Elm və təhsil

20 Yanvar xalqımızın öz azadlığı uğrunda mübarizə tarixinin şərəfli səhifələrindədir

Azərbaycan Milli Elmlər Akademiyasının Arxeologiya və Antropologiya İnstitutunda 20 Yanvar faciəsinin 35-ci ildönümü ilə əlaqədar anım mərasimi keçirilib.

Crossmedia.az xəbər verir ki, tədbirdə iştirak edən institut əməkdaşları dövlətimizin müstəqilliyi və ərazi bütövlüyü uğrunda canlarından keçmiş şəhidlərin əziz xatirəsini bir dəqiqəlik sükutla yad ediblər.

Tədbiri giriş sözü ilə açan institutun direktoru dosent Fərhad Quliyev bildirib ki, 35 il öncə, 1990-cı ilin yanvarında Azərbaycan xalqı işğalçı sovet ordusunun qarşısına əliyalın çıxaraq öz milli iradəsini, azadlıq və müstəqillik uğrunda birliyini bütün dünyaya nümayiş etdirdi. Bu tarixi hadisə Azərbaycanın mübarizə ruhunun, xalqın öz haqlarını qorumaq üçün göstərdiyi cəsarətin bariz nümunəsinə çevrildi. Həmin dövrdə Moskvada yaşayan Ümummilli Liderimiz Heydər Əliyev xalqımızın hüquqlarını müdafiə etmək üçün böyük təhlükələrə rəğmən Azərbaycanın Moskvadakı daimi nümayəndəliyinə gələrək burada keçirdiyi mətbuat konfransı vasitəsilə Qorbaçov rejiminin törətdiyi bəşəri cinayəti sərt şəkildə qınadı və bu qanlı hadisəyə qarşı öz etirazını açıq şəkildə ifadə etdi. Bu addım xalqımızın haqq səsinin beynəlxalq arenada eşidilməsi üçün mühüm bir hadisə oldu.

Həmçinin, Fərhad Quliyev vurğulayıb ki, siyasi hakimiyyətə qayıdışından sonra məhz, Ümummilli Lider 1990-cı ilin 20 Yanvar hadisələrinə hüquqi-siyasi qiymət verilməsinə nail oldu.

Tarix elmləri doktoru dosent Vəfa Mahmudova, tarix üzrə fəlsəfə doktoru dosent Anar Ağalarzadə çıxışlarında bildiriblər ki, 20 Yanvar xalqımızın öz azadlığı uğrunda mübarizə tarixinin şərəfli səhifələrindədir.