Zelenski Putinlə ərazi məsələsini müzakirə etməyə hazırdır — Andrey Sibiqa
Ukrayna Prezidenti Volodimir Zelenski Rusiya Prezidenti Vladimir Putinlə görüşməyə və ərazi məsələsi də daxil olmaqla ən mürəkkəb mövzuları müzakirə etməyə hazırdır. Bu barədə Ukraynanın xarici işlər naziri Andrey Sibiqa Finlandiyanın Helsingin Sanomat nəşrinə açıqlamasında bildirib.
Crossmedia.az xəbər verir ki, Sibiqanın sözlərinə görə, Finlandiya Prezidenti Aleksandr Stubb və Norveçin Baş naziri Yonas Qar Störenin Putinlə telefon danışığı Ukrayna ilə razılaşdırılıb. Danışıqlarda əsasən atəşkəsə çağırış və Zelenski ilə Putinin görüşünün təşkili məsələləri müzakirə olunub.
Sibiqa hesab edir ki, iki liderin birbaşa görüşü danışıqlara yeni dinamika verə, əsirlərin mübadiləsi və oğurlanmış uşaqların geri qaytarılması kimi konkret addımlara yol aça bilər.
Nazir görüşün Moskvada və ya Belarusda keçirilməsinə qarşı olduqlarını vurğulayıb. O, görüşün bu iki məkandan kənarda təşkil edilməsinin vacib olduğunu bildirib və Şimali Koreya ilə bağlı zarafat da edib.
Sibiqanın məlumatına görə, Ukrayna, ABŞ və Rusiya arasında üçtərəfli danışıqların noyabr ayında Əbu-Dabidə davam etdirilməsi nəzərdə tutulur. Bununla belə, Kiyev Moskvanın müharibəni diplomatik yolla başa çatdırmaq niyyətində olduğuna dair hələlik əlamətlər görmür.
Ukraynanın xarici işlər naziri Avropanın sülh prosesində rolunun gücləndirilməsinə və ölkələrin vahid mövqedən çıxış etməsinə çağırıb. O, ABŞ-ın iştirakı olmadan müharibənin başa çatdırılmasının və real təhlükəsizlik təminatlarının əldə edilməsinin çətin olacağını qeyd edib.
21:42 29.10.2026
Oxunuş sayı: 50
