“Bakı Atatürk Liseyi”ndə cavabsız suallar: Samir Balakişiyev hansı meyarlarla vəzifəyə təyin olunub?
Təhsil hər bir cəmiyyətin gələcəyini müəyyən edən, insanların dünyagörüşünün formalaşmasında, milli və mənəvi dəyərlərin qorunmasında mühüm rol oynayan əsas sahələrdən biridir. Təhsil müəssisələri yalnız bilik verən məkanlar deyil, eyni zamanda şəxsiyyət yetişdirən, gənc nəslə davranış, məsuliyyət və cəmiyyət qarşısında öhdəlik nümunəsi göstərən ocaqlardır. Bu baxımdan həmin müəssisələrdə çalışan hər bir şəxsin, xüsusilə də rəhbər vəzifə tutanların üzərinə daha böyük məsuliyyət düşür. Çünki rəhbər yalnız idarəetmə ilə məşğul olan şəxs deyil, həm də müəllimlər, şagirdlər və valideynlər üçün nümunə olmalı, fəaliyyəti ilə etimad qazanmalı, peşəkarlığı və şəxsi keyfiyyətləri ilə seçilməlidir.
Bu məsuliyyət Türkiyəni Azərbaycanda təmsil edən, üstəlik, Türkiyə Cümhuriyyətinin qurucusu Mustafa Kamal Atatürkün adını daşıyan “Bakı Atatürk Liseyi” kimi təhsil müəssisələrində daha böyük əhəmiyyət kəsb edir. Belə bir təhsil ocağının adı təkcə onun fəaliyyət göstərdiyi ölkə ilə deyil, həm də daşıdığı ideoloji, tarixi və mənəvi dəyərlərlə bağlıdır. Buna görə də burada baş verən hər hansı mənfi hal, rəhbər şəxslərlə bağlı yaranan ciddi suallar və mümkün pozuntulara dair iddialar diqqətdən kənarda qalmamalıdır.
Təəssüf ki, “Bakı Atatürk Liseyi”ndə direktor müavini vəzifəsində çalışan Samir Balakişiyevin (Turan) adı ətrafında yaranmış məsələlər illərdir tam aydınlığa qovuşmayıb. Samir Balakişiyevlə bağlı məsələlər hələ də cavabsız qalır. Mövzunu yenidən gündəmə gətirməyimizin səbəbi əvvəlki iddiaların hələ də cəmiyyət üçün aydınlıq qazanmaması və bütün bunlara baxmayaraq, onun həmin vəzifədə fəaliyyətini davam etdirməsidir. Söhbət yalnız onun təhsil keçmişi ilə bağlı yayılan məlumatlardan deyil, müəllimlər üçün dövlət qurumlarının adından saxta imtahan təşkil edildiyinə dair iddialardan da gedir. Belə ciddi məsələlərə aydınlıq gətirilmədən, mümkün pozuntulara görə məsuliyyət müəyyənləşdirilmədən həmin şəxsin rəhbər vəzifədə qalması təhsil sistemində şəffaflıq və hesabatlılıq baxımından haqlı suallar doğurur. Əgər bu iddialar üzrə araşdırma aparılıbsa, nəticələri niyə ictimaiyyətə açıqlanmır? Əgər pozuntular təsdiqlənibsə, müvafiq tədbirlər görülübmü? Məhz bu suallara cavab tapmaq üçün mövzuya yenidən qayıdırıq.
Samir Balakişiyevin adı ətrafında yaranan suallar artıq yalnız onun təhsil keçmişi ilə məhdudlaşmır. Vaxtilə təhsil aldığı universitetdən qovulması ilə bağlı iddialar, 2019-cu ildən çalışdığı “Bakı Atatürk Liseyi”ndə müəllimlər üçün dövlət qurumlarının adından (Təhsil Nazirliyi, Dövlət İmtahan Mərkəzi) saxta imtahan təşkil edildiyinə dair iddialar və bütün bunların fonunda onun rəhbər vəzifədə qalması ciddi araşdırma, açıqlama tələb edir. Ən vacib sual isə budur: təhsil sistemində şəffaflıq və peşəkarlıq tələb olunduğu halda, bu cür iddialara niyə aydınlıq gətirilmir?
Mətbuat və sosial şəbəkələrdə yayılan məlumatlara görə, Samir Gülbaba oğlu Balakişiyev 2006–2007-ci tədris ilində “Odlar Yurdu” Universitetinin Beynəlxalq iqtisadi münasibətlər fakültəsinə qəbul olunub. Həmin məlumatlarda onun dərslərdə mütəmadi iştirak etmədiyi, təhsil müəssisəsində üzərinə düşən öhdəliyi yerinə yetirmədiyinə görə universitetdən qovulduğu iddia olunur.
Məlumatlarda universitetin rektoru Əhməd Vəliyevdən Balakişiyevin universitetdən qovulmaması üçün xahişlər edildiyi də bildirilir. Həmçinin 2 dekabr 2008-ci il tarixli, 34-T nömrəli əmrə istinad olunur. Həmin sənədin məzmunu və universitetdən ayrılmanın hüquqi əsası rəsmi qaydada təsdiqlənməlidir. Əgər Balakişiyevin ali təhsilini başa vurmadığı iddiası doğrudursa, onun sonrakı təhsil sənədləri və hazırkı vəzifəyə uyğunluğu barədə sualların cavablandırılması zəruridir.
Burada məsələni yalnız universitetdən ayrılma faktına bağlamaq da doğru olmaz. Əsas sual budur: Balakişiyevin hazırda hansı təhsil sənədləri var, hansı ixtisas üzrə hazırlıq keçib və direktor müavini vəzifəsinə təyin olunarkən hansı peşəkar meyarlar əsas götürülüb?
Dövlət qurumlarının adından imtahan keçirilməsi iddiası
Məsələni daha ciddi edən digər məlumat isə müəllimlər üçün Dövlət İmtahan Mərkəzinin və Təhsil Nazirliyinin adından saxta imtahan təşkil edildiyinə dair iddiadır. Əgər bu məlumat təsdiqlənərsə, söhbət sadəcə məktəbdaxili kadr seçimini deyil, dövlət qurumlarının adından istifadə olunmasının hüquqi və etik nəticələrini də qabardır.
Mətbuatda 2019-cu ildə “Bakı Atatürk Liseyi”ndə müəllimlər üçün imtahan keçirildiyi barədə məlumat yayımlanıb. Həmin vaxt liseyin direktoru Eylem Gültekin imtahanın müəllimlərin bilik səviyyəsini yoxlamaq və vakant yerlərə işə qəbul məqsədi daşıdığını açıqlayıb. Ancaq bu imtahanın saxta olduğu və Dövlət İmtahan Mərkəzi ilə Təhsil Nazirliyinin adından qanunsuz istifadə edildiyinə dair iddialar gündəmə gəlib.
Çoxsaylı suallara cavab verilməlidir: Müəllimlərə imtahanın hansı qurum tərəfindən təşkil edildiyi bildirilib? Onlara Dövlət İmtahan Mərkəzinin və ya Təhsil Nazirliyinin rəsmi imtahanı kimi təqdimat olubmu? İmtahanın nəticələri hansı sənəd əsasında rəsmiləşdirilib? Müəllimlərə verilən məlumatlarda dövlət qurumlarının adlarından, blanklarından və ya digər rəsmi atributlarından istifadə edilibmi? Bu suallara cavab verilmədən məsələni bağlanmış hesab etmək olmaz.
Lisey rəhbərliyi niyə susur?
Samir Balakişiyevin direktor müavini vəzifəsində çalışmasının hansı əsaslarla, hansı peşəkar fəaliyyəti, üstün bacarıqları, savadı əsasında seçim edilməsi ictimaiyyətə açıqlanmalıdır. Lisey rəhbərliyi onun təhsili, təcrübəsi və vəzifəyə uyğunluğu barədə sualları cavablandırmalıdır. Təhsil sənədləri və peşəkar göstəricilər qaydasındadırsa, bunu rəsmi şəkildə açıqlamaq ətrafında yaranmış şübhələri aradan qaldırmağın ən sadə yoludur. Daha dəqiq desək - ictimaiyyətdə Samir Turan imzasıyla tanınan Samir Balakişiyev hansı keyfiyyətlərinə görə savadlı, bacarıqlı, hazırlıqlı müəllim ordusuna rəhbərik edir? S.Balakişiyev hansı ali məktəbin peşəkar məzunu olaraq bu vəzifəyə yiyələnə bilib?
Əgər müəllimlər üçün keçirilən imtahanın dövlət qurumlarının adı ilə təqdim edildiyi iddiası da təsdiqlənərsə, lisey rəhbərliyi həmin prosesdə kimin iştirak etdiyini, qərarların kim tərəfindən verildiyini və nəticələrin hansı əsaslarla rəsmiləşdirildiyini izah etməlidir. S.Balakişiyev imtahan etdiyi müəllimlərdən hansı savad və bilik göstəricilərinə görə üstündür ki, onları yoxlaya bilir?
Cəmiyyətin qarşısında başqa bir sual da dayanır: təhsil müəssisəsində rəhbər vəzifəyə təyinat zamanı hansı meyarlar tətbiq edilir? Peşəkar hazırlıq və sənədlərlə təsdiqlənən təcrübə əsas götürülür, yoxsa kadr qərarlarının arxasında başqa amillər dayanır?
Bəzi dairələrin xahişi və ya himayəsi nəticəsində Balakişiyevin vəzifədə saxlanıldığı barədə iddialar da səsləndirilir. Bu iddialara cavab verilməlidir.
Təhsil müəssisəsində məsuliyyət kimə aiddir?
Məktəb rəhbərliyi sadəcə vəzifə bölgüsü aparan inzibati struktur deyil. Burada verilən qərarlar müəllimlərin iş şəraitinə, tədrisin keyfiyyətinə və valideynlərin təhsil müəssisəsinə münasibətinə təsir edir. Buna görə də rəhbər vəzifələrə təyinatlar şəxsi münasibətlərdən asılı olmayan, aydın və yoxlanıla bilən meyarlara söykənməlidir.
Təhsil sistemində əsas prinsip aydın olmalıdır: heç bir vəzifə sahibi ictimai suallardan üstün deyil. Liseydə rəhbər vəzifəyə kimin gətirilməsi, hansı meyarlarla seçilməsi və dövlət qurumlarının adlarından necə istifadə olunması barədə suallar cavabsız qaldıqca, məsələ yalnız bir şəxsin fəaliyyəti ilə məhdudlaşmır. Söhbət təhsil müəssisəsində şəffaflıqdan, idarəçilik məsuliyyətindən və ictimai etimaddan gedir. Lisey özəl olsa belə təhsil ocağıdır. Orada övladlarımız təhsil alır. Qeyd edilən məsələlər isə ciddi narahatlıq yaradır. Bütün bunlara aydınlıq gətirilməli, sosial şəbəkələrdə və saytlarda işıqlandırılan faktlar cavablandırıılmalı, təhsil müəssisələrimiz savadlı, bacarıqlı, peşəkar kadrların idarəçiliyinə həvalə olunmalıdır.
11:00 03.11.2026
Oxunuş sayı: 2032
