Cəmiyyət
Deputatdan Qarabağla bağlı anons: Turizm mərkəzinə çevrilir
Dünya iqtisadiyyatının ən gəlirli və strateji sahələrindən biri hesab edilən turizm sektoru 2025-ci ildə rekord göstəricilərə imza ataraq 11,6 trilyon dollarlıq həcmə çatıb, qlobal ÜDM-in 9,8 faizini formalaşdırıb və 366 milyon iş yerini təmin edib. Qeyri-neft sektorunun inkişafını və iqtisadiyyatın şaxələndirilməsini əsas prioritet elan edən Azərbaycan üçün bu nəhəng beynəlxalq bazardan daha böyük pay almaq həyati əhəmiyyət daşıyır. Məhz bu diplomatik və iqtisadi strategiyanın tərkib hissəsi olaraq, oktyabrın 26-da Azərbaycan Respublikasının Prezidenti İlham Əliyev BMT-nin Turizm Təşkilatının Baş katibi Şeyxa Əl Nuveysini qəbul edib.
Ölkə rəhbərliyinin bu ali qəbulu Azərbaycanın qlobal turizm xəritəsindəki mövqeyini möhkəmləndirmək, Qarabağ və Şərqi Zəngəzurun sürətlə bərpa olunan infrastrukturunu beynəlxalq marşrutlara inteqrasiya etmək və xarici investisiya axınını təmin etmək niyyətini bir daha nümayiş etdirir.
Bu strateji məsələnin iqtisadi dividendini, azad edilmiş ərazilərin potensialını və dövlətin turizm siyasətinin perspektivləri barədə Milli Məclisin deputatı Azər Badamov Crossmedia.az-a danışıb:
"Azərbaycanın BMT-nin Turizm Təşkilatı ilə əməkdaşlığının genişləndirilməsi ölkə iqtisadiyyatı üçün mühüm imkanlar yaradır. Çünki turizm bu gün qlobal iqtisadiyyatın ən böyük sektorlarından biridir. 2025-ci ildə dünya üzrə turizmin iqtisadi töhfəsi 11,6 trilyon dollara çatıb, bu sektor qlobal ÜDM-in 9,8 faizini təşkil edib və 366 milyon iş yerini dəstəkləyib. Azərbaycan kimi zəngin turizm potensialına malik ölkə üçün bu bazardan daha böyük pay əldə etmək strateji əhəmiyyət daşıyır. Prezident İlham Əliyevin oktyabrın 26-da BMT-nin Turizm Təşkilatının Baş katibi Şeyxa Əl Nuveysini qəbul etməsi də beynəlxalq əməkdaşlığın genişləndirilməsi baxımından mühüm əhəmiyyət kəsb edir".
Deputat bu tərəfdaşlığın investisiya axınına, kadr hazırlığına və beynəlxalq brendinqə verəcəyi faydaları diqqətə çatdırıb:
"Hesab edirəm ki, bu əməkdaşlıq ölkəmizə ilk növbədə daha çox xarici turistin cəlb olunması, turizm imkanlarımızın beynəlxalq səviyyədə tanıdılması və sektora xarici investisiyaların artırılması baxımından fayda verə bilər. Eyni zamanda turizm xidmətlərinin beynəlxalq standartlara uyğunlaşdırılması, kadr hazırlığı və müasir marketinq imkanlarından istifadə ölkəmizin rəqabət qabiliyyətini yüksəldə bilər".
Azər Badamov Qarabağ və Şərqi Zəngəzurun qlobal turizm mərkəzinə çevrilməsi konsepsiyasını vurğulayaraq fikrini yekunlaşdırıb:
"Digər mühüm istiqamət regionların turizm potensialının reallaşdırılmasıdır. Xüsusilə Qarabağ və Şərqi Zəngəzurda yaradılan infrastruktur bu ərazilərin gələcəkdə mühüm turizm istiqamətlərinə çevrilməsi üçün geniş imkanlar açır. Bu, yeni iş yerlərinin yaradılması, yerli sahibkarlığın inkişafı və regionlara əlavə gəlirlərin daxil olması deməkdir. Əsas məqsədimiz yalnız turistlərin sayını artırmaq deyil, onların ölkədə daha uzun müddət qalmasına, daha çox xidmətlərdən istifadə etməsinə və iqtisadiyyata daha böyük töhfə verməsinə nail olmaqdır. Beləliklə, BMT-nin Turizm Təşkilatı ilə əməkdaşlığın gücləndirilməsi Azərbaycanın qeyri-neft sektorunun inkişafına, iqtisadiyyatın şaxələndirilməsinə və dünya turizm bazarında mövqelərinin möhkəmlənməsinə xidmət edə bilər".
Zeynəb Həsən
12:30 28.10.2026
Oxunuş sayı: 73
