Qaynar suyu çanağa tökmək borulara zərər verə bilər
Qaynar suyun kanalizasiya borularına müntəzəm tökülməsi plastik boruların zədələnməsinə və sızmalara səbəb ola bilər.
Crossmedia.az xəbər verir ki, bu barədə “UNİAN” məlumat yayıb.
Mütəxəssis Faraonenin sözlərinə görə, metal borular yüksək temperatura davamlıdır və onların qaynar su ilə yuyulması yağ qalıqlarının əriməsinə, borularda toplanan çöküntülərin təmizlənməsinə kömək edə bilər.
Lakin evdə PVC və ya digər plastik materiallardan hazırlanmış borular quraşdırılıbsa, vəziyyət dəyişir. Qaynar suyun davamlı təsiri plastik birləşmələri yumşalda, onları zədələnməyə daha həssas edə bilər. Bu isə zamanla materialın aşınmasına və su sızmalarına gətirib çıxara bilər.
Mütəxəssis bildirir ki, qaynar suyu axıdarkən eyni vaxtda soyuq suyu açmaq da boruları temperatur dəyişməsinin təsirindən tam qorumur. Əksinə, kəskin temperatur fərqi PVC borularda çatların yaranması riskini artıra bilər.
Boru sisteminin zədələnmə ehtimalını azaltmaq üçün qaynar suyu axıtmadan əvvəl təxminən bir dəqiqə soyutmaq tövsiyə olunur.
Qaynar suyu nə qədər tez-tez axıtmaq olar?
Metal boruların qaynar su ilə bir-iki həftədən bir yuyulmasının adətən problem yaratmadığı bildirilir. Plastik borularda isə bu üsuldan ayda bir-iki dəfədən çox istifadə etməmək məsləhət görülür. Yüksək temperaturun tez-tez təsiri plastik materialların aşınmasını sürətləndirə bilər.
07:30 25.10.2026
Oxunuş sayı: 72
