Yeni araşdırma: Ürəyin “Mini Beyni” kəşf edildi – özünü idarə edir
Elm adamlarının apardığı yeni bir araşdırma ürəyin yalnız beyindən gələn siqnallarla işlədiyi fikrini alt-üst etdi. Tədqiqatlar göstərib ki, ürək mürəkkəb bir sinir şəbəkəsinə malikdir. “Mini beyin” adlandırılan bu müstəqil sinir sistemi ürəyin ritmini tənzimləyir.
Karolinska İnstitutu və Kolumbiya Universitetindən elm adamları ürəyin avtonom sinir sistemi ilə işlədiyini və bu sistemin daha mürəkkəb bir quruluşa malik olduğunu kəşf ediblər. Tədqiqatı idarə edən Karolinska İnstitutunun Neyroelm Bölməsindən Konstantinos Ampatzis bu sinir sisteminin ətraflı təhlilinin aritmiya kimi ürək xəstəliklərinə qarşı yeni müalicələrin inkişafına yol aça biləcəyini bildirib. O qeyd edib: “Ürəyin bu qədər mürəkkəb bir sinir şəbəkəsinə malik olduğunu görəndə çox təəccübləndik. Bu sistemi başa düşmək, ürək xəstəliklərində inqilab yarada bilər”.
Araşdırmada zebra balığı modeli istifadə edilib. Bu balıq növü, ürək döyüntüsü və funksiyalarında insan ürəyinə bənzər xüsusiyyətlər göstərir. Təkhüceyrəli RNA ardıcıllığı, elektrofizioloji və anatomik tədqiqatlarla ürəkdəki neyronların quruluşu, təşkili və funksiyası ətraflı şəkildə xəritələndirilib.
Ampatzis araşdırmanın növbəti mərhələsində ürək sinir şəbəkəsinin stress, məşq və ya xəstəlik kimi vəziyyətlərdə necə işlədiyini və bu prosesdə beynin rolunu araşdıracaqlarını açıqlayıb. Bundan əlavə, ürək neyronlarındakı pozğunluqların müxtəlif xəstəliklərə necə təsir etdiyini başa düşmək üçün işlərin davam etdirildiyini bildirib.
Nərgiz Orucova
13:03 06.01.2025
Oxunuş sayı: 7839
