Sosium

Sosial şəbəkələrdə təhqirə görə cəza nə qədərdir? - Hüquqşünas açıqladı

Son günlərdə TikTok sosial şəbəkəsindəki bəzi hadisələr cəmiyyətdə narahatlıq yaradır. Populyarlıq qazanmaq istəyən bəzi şəxslər milli-mənəvi dəyərlərimizə zidd hərəkətlər edir.
Bəs hansı hallarda həmin şəxslər məsuliyyətə cəlb olunur?

Mövzu ilə bağlı Vəkillər kollegiyasının üzvü, vəkil Arslan Mikayilov Crossmedia.az-a verdiyi açıqlamasında bildirib ki, şəxsin cinayət məsuliyyətinə cəlb edilməsi üçün ilk növbədə həmin əməlin Cinayət Məcəlləsində nəzərdə tutulması tələb olunur:
"Yəni, əgər bu əməl Cinayət Məcəlləsində qeyd olunmayıbsa, şəxsi cinayət məsuliyyətinə cəlb etmək mümkün deyil.
Sosial şəbəkələrlə bağlı məsələyə gəlincə, saxta profillər yaradaraq şəxslərə qarşı açıq şəkildə təhqir və böhtan atan şəxslərin məsuliyyəti artıq qanunvericilikdə müəyyən edilib. Bu cəzalar 1000 manatdan 2000 manatadək cərimə və ya bir ilədək azadlıqdan məhrumetmə cəzasını əhatə edir.

Ümumilikdə onu da qeyd etmək istərdim ki, bu gün hüquq mühafizə orqanları sosial şəbəkələrə nəzarət edir. Qeyd etdiyiniz hallar baş verdikdə müvafiq profilaktik söhbətlər edərək tərbiyələndirmə işləri aparırlar. Əgər inzibati məsuliyyət yaranarsa, bu şəxslər inzibati qaydada məsuliyyətə cəlb edilə bilərlər. Amma qeyd etdiyim kimi, Cinayət Məcəlləsində şəxsin bilavasitə əxlaqsız hərəkətləri ilə bağlı konkret maddə hələ nəzərdə tutulmayıb".
Hüquqşünas qanunvericiliyimizin daim dəyişdiyini və yeniləndiyini də qeyd etdi. Onun sözlərinə görə, müasir dövrün tələblərinə uyğun olaraq yeni qanunlar qəbul edilir:
"Bəzi əməllər, əvvəl cinayət sayılmadığı halda, Cinayət Məcəlləsinə əlavə edilərək cinayət hesab edilə bilər. Gələcəkdə qanunvericiliyə dəyişikliklər edildiyi təqdirdə, həmin şəxslərin məsuliyyəti dəqiq şəkildə müəyyən edilə bilər.