Mızrak razılaşması Bakının hərbi imkanlarını necə dəyişəcək? – Deputatdan AÇIQLAMA
Azərbaycanın “ADEX 2026” sərgisində Türkiyənin müdafiə sənayesi şirkəti “Baykar”la uzaqmənzilli MIZRAK kamikadze dronlarının tədarükünə dair saziş imzalaması Bakı-Ankara hərbi-texniki əməkdaşlığında yeni mərhələyə diqqət çəkir. Azərbaycan MIZRAK-ın məlum olan ilk xarici alıcısı olub. Baykarın məlumatına görə, 1000 kilometrdən artıq mənzilə malik sistem süni intellekt dəstəkli avtonom imkanlarla hazırlanıb.
MIZRAK-ın tədarükü “ADEX 2026” çərçivəsində Azərbaycan və Türkiyə arasında müdafiə sənayesi sahəsində imzalanan digər əməkdaşlıq sənədləri ilə birlikdə iki ölkənin hərbi-texniki əlaqələrinin genişlənməsini göstərir. Azərbaycan Müdafiə Nazirliyi də sərgi çərçivəsində Türkiyə şirkətləri ilə birgə layihələrin inkişaf perspektivlərinin müzakirə edildiyini açıqlayıb.
Crossmedia.az-a açıqlamasında Milli Məclisin deputatı Elşad Musayev Azərbaycanın son illərdə müxtəlif istiqamətlərdə gücləndiyini və xüsusilə müdafiə sənayesinin inkişafına diqqətin artırıldığını bildirib. O qeyd edib: “Azərbaycan hər bir baxımdan son illər xeyli güclənib. 44 günlük müharibədə Azərbaycan özünün hərbi müdafiə sənayesinə diqqət yetirdiyini açıq göstərdi və 44 günlük müharibədən sonrakı dövrdə də Azərbaycan dövlət olaraq öz müdafiə qüdrətini artırmaqla məşğuldur”.
Deputat Azərbaycanla bir sıra ölkələr arasında hərbi əməkdaşlığın mövcud olduğunu və dronların istehsalı, alınması və lisenziya hüquqlarının əldə edilməsinin gündəmdə olduğunu vurğulayıb: “Bizim bir sıra ölkələrlə hərbi sahədə əməkdaşlığımız var, o cümlədən də qardaş Türkiyə ilə. Bu dronların necə istehsalı məsələsi, bir tərəfdən alınması məsələsi, həm də lisenziya hüququnun alınması məsələsi də daima gündəmdədir. Çox qarışıq dövrdə yaşayırıq. Yeni dünya düzəni qurulur və burada da beynəlxalq hüquq yoxdur, daha çox beynəlxalq güc var. Ona görə bu beynəlxalq vəziyyəti nəzərə alıb hər bir baxımdan güclü olmaq məcburiyyətindəyik”.
Elşad Musayev Mızrak dronları ilə bağlı atılan addımları da qiymətləndirərək Azərbaycan-Türkiyə hərbi əməkdaşlığının gələcəkdə daha da genişlənəcəyini bildirib: “Bu Mızrak dronları ilə bağlı atılan addımları da doğru addım kimi qiymətləndirirəm. Qardaş Türkiyəni nəzərə alaq ki, bizim strateji müttəfiqimizdir. Ən çətin anlarda Türkiyə dünyada da olub, arxamızda olub. Ona görə mən düşünürəm ki, Azərbaycanın Türkiyə ilə hərbi əməkdaşlığı daha da artırılacaq”.
Deputat Türk Dövlətləri Təşkilatına daxil olan ölkələrin də bu prosesdə iştirak edəcəyini qeyd edib: “Eyni zamanda Türk Dövlətləri Təşkilatına daxil olan ölkələr də bu prosesin içində öz yerini alacaqlar. Yəni həm hərbi, həm silah-sursatın birgə istehsalı, istifadəsi və hərbi sahədə əməkdaşlıq yeni mərhələyə qədəm qoyacaq”.
Nigar Xəlilli
20:00 01.10.2026
Oxunuş sayı: 45
