Vətəndaşlar üçün ödəniş sistemində yenilik - AÇIQLAMA
Azərbaycanda dövlət rüsumları ilə bağlı mühüm yenilik tətbiq ediləcək. Ölkədə "Dövlət rüsumlarının elektron idarəedilməsi (e-rüsum)" informasiya sistemi yaradılacaq. Bu məsələ hazırda Milli Məclisdə baxılan "Dövlət rüsumu haqqında" Qanuna təklif edilən dəyişiklikdə əksini tapıb. Layihəyə əsasən, yeni informasiya sistemi vasitəsilə, dövlət rüsumunun dövlət büdcəsinə köçürülməsi üçün "e-bildiriş" təqdim ediləcək, dövlət rüsumundan daxil olan vəsaitləri hesablayacaq. Artıq ödənilmiş və ya düzgün tutulmamış dövlət rüsumu ilə bağlı müraciətlər də bu sistem vasitəsilə qəbul edilib baxılacaq. Bəs bu sistem dövlət rüsumlarının ödəniş prosesini vətəndaşlar üçün nə dərəcədə sadələşdirəcək?
Məsələ ilə bağlı iqtisadçı Eyyub Kərimli Crossmedia.az-a açıqlamasında bildirib ki, ümumiyyətlə Maliyyə Nazirliyi də vurğulayıb ki, bəzən cərimələr ödənilir, lakin büdcəyə gəlmir:
"Hesab edirəm ki, cərimələrin elektron portal vasitəsilə izlənməsi vahid reyestrin təşkil olunmasına dəstək olacaq və bu da öz növbəsində cərimələrin daha şəffaf ödənilməsinə və icrasına yardımçı olacaq. Səhvən ödənilən cərimələr və yaxud digər hallar baş verdikdə, həm bu hərəkətlər izlənilə bilinəcək, həm də büdcəyə cəlb olunması təmin olunacaq. Ötən il 9 milyon manata yaxın cərimələr olub və bu da büdcəyə daxil olub, lakin bəzi hallarda bir sıra təşkilatlar cərimələri özlərində saxlayır və ya büdcəyə yönəltmir, buna görə də, fikrimcə, portal bu cür halların qarşısının alınmasına müsbət təsir göstərəcək".
Gülşad İbrahimova
11:52 03.01.2025
Oxunuş sayı: 23000
