Sosium

Kriptovalyutanın yeni erası: Bitkoin 3 dəfədən çox bahalaşa bilər?

2024-cü ildə bitkoin iki dəfədən çox artıb. Onun qiymətinin bu il də artmağa davam edəcəyi ehtimalı var. Dünyanın ən böyük və ən məşhur kriptovalyutası bu ayın əvvəlində 100 min dollara çatıb. Analitiklər hesab edir ki, 2025-ci ildə bitkoin qiymətləri əvvəlkindən daha çox artacaq. Qeyd olunur ki, bitkoin 2025-ci ilin sonunda 200 min dollar səviyyəsinə çata bilər. Bəs bitkoinin hətta 3 dəfədən də çox artması gözlənilirmi və bu, hansı nəticələrə səbəb ola bilər?

Məsələ ilə bağlı iqtisadçı Natiq Cəfərli Crossmedia.az saytına açıqlamasında bildirib ki, bitkoinin qiymətinin artmasının yeganə səbəbi İlon Maskın prezident Trampla birgə seçkilərdə qalib gəlməsidir:

"Yəni kriptovalyutanın arxasında duran şəxslərdən biri İlon Maskdır və seçki kampaniyası zamanı Tramp dəfələrlə bəyan etdi ki, bitkoin üçün daha yaxşı şərait yaradılacaq. Tək bu məsələyə görə Tramp seçilən kimi bitkoin, demək olar ki, iki dəfə bahalaşdı, onun başqa heç bir səbəbi yoxdur, ona görə də, düşünürəm ki, bu, həddindən artıq spekulyativ və xəbər axınlarına bağlı bir valyutadır. İndi spekulyasiyalar qiymətin artımı yolundadır, amma bir müddətdən sonra Amerika Birləşmiş Ştatları requlyativ qərarlar qəbul etsə, əksinə bitkoinin qiymətinin tamamilə çox-çox aşağı düşməsini də görə bilərik. Düzdür, qiymətinin 200-250 min olması Tramp dövründə də mümkündür, amma Tramp dörd il hakimiyyətdə olacaq, əsas məsələ budur ki, dörd ildən sonra nə olacaq".