Suriyada siyasi qüvvələr bir araya gəlir: Anlaşma əldə olunacaqmı?
Suriya üçün yeni bir inkişaf mərhələsinin başlanğıcı olan milli konfrans, ölkənin son illərdə yaşadığı çətinlikləri aradan qaldırmaq və davamlı sülhü təmin etmək məqsədini güdür. Konfransın məqsədi müxtəlif dini və etnik qrupların, həmçinin cəmiyyətin müxtəlif təbəqələrinin iştirakını təmin edərək birgə qərarların qəbulunu asanlaşdırmaqdır. Müzakirələr, Suriyanın gələcəyinə dair vacib qərarların qəbul edilməsində mühüm rol oynaya bilər. Bu təşəbbüs, həm ölkədaxili əmin-amanlığın, həm də beynəlxalq ictimaiyyətin diqqətində olan humanitar problemlərin həllinə müsbət təsir göstərə bilər.
Mövzu ilə bağlı siyasi şərhçi Əziz Əlibəyli Crossmedia.az-a verdiyi açıqlaması zamanı bildirib ki, Suriyanın gələcəyi ilə bağlı qərarlar diqqətlə qəbul edilməlidir, lakin bu prosesdə aparıcı qüvvələrin hansı mövqeyi dəstəklədiyi xüsusi əhəmiyyət kəsb edir:
“Ərəb ölkələri, eləcə də ərəb-türk münasibətlərinin yeni bir mərhələyə qədəm qoymasına maraq göstərirlər. Onlar Suriyanın ərazi bütövlüyünün təmin olunmasını prioritet hesab edir və keçid hökuməti səviyyəsində təkliflər irəli sürüblər. Bu təkliflərə əsasən, Suriyada fəaliyyət göstərən bütün silahlı qruplaşmalar ləğv edilməli və vahid şəkildə Suriya ordusuna inteqrasiya olunmalıdır. Bununla belə, kürd məsələsi hələ də açıq olaraq qalır və ciddi müzakirə tələb edir”.
Siyasi şərhçi əlavə edib ki, digər böyük problem isə İranın regionda dəstəklədiyi silahlı qruplaşmalar, xüsusilə də şiə hərbi birlikləri və Həşdi Şabi qüvvələrinin dağıdıcı fəaliyyətidir:
“Bu qruplara qarşı konkret və effektiv addımlar atılmalıdır. Lakin bu məsələdə də ciddi maneələr və münaqişələr yaranacağı gözlənilir. Eyni zamanda, beynəlxalq güclər, xüsusən də əsas aktorlar, Suriyanın ərazi bütövlüyünün qorunması mövqeyində dayanırlar. Böyük ehtimalla, qarşıdan gələn konfranslar və danışıqlar prosesində bu istiqamətdə üstünlük təşkil edən qərarlar qəbul ediləcək”.
Son olaraq Ə.Əlibəyli onu da vurğulayıb ki, davamlı sülh və sabitlik üçün beynəlxalq əməkdaşlıq, eləcə də bütün tərəflərin maraqlarının balanslaşdırılması zəruridir.
Aytac Bəhruzqızı
10:50 02.01.2025
Oxunuş sayı: 19801
