Canlı yayımda qumar təşkil edənlər üçün sərt sanksiyalar
Son vaxtlar sosial şəbəkələrdə canlı yayımlar vasitəsilə qumar oyunlarının keçirilməsi hallarının artdığı müşahidə olunur. Bu yayımlarda həm məğlub olub oyundan çıxanlar, həm də uduzmasına baxmayaraq oyunu davam etdirənlər olur.
Bəs canlı yayımda qumar oyunları təşkil edən şəxsləri və qumar oynayanları hansı cəzalar gözləyir?
Mövzu ilə bağlı hüquqşünas Ramil Süleymanov Crossmedia.az-a verdiyi açıqlamasında bildirib ki, Azərbaycan Respublikasının ərazisində onlayn qaydada internet resursları üzərindən həyata keçirilən idman mərc oyunları Azərbaycan Respublikasının "Lotereyalar haqqında", "Bədən tərbiyəsi və idman haqqında" qanunlarına uyğun şəkildə təşkil olunmalıdır:
"Bunun üçün xüsusi razılıq alınması zəruridir. Qeyd edim ki, bu fəaliyyət qanunsuz olaraq qumar oyunlarının təşkili və keçirilməsi cinayətinə aid edilir və qanunla sanksiyaya məruz qalır. Belə ki, qumar oyunlarının təşkili və keçirilməsi, həmin oyunlar üçün məkanın təşkil olunması və saxlanılması Azərbaycan Respublikasının Cinayət Məcəlləsinin 244-1.1 maddəsinə əsasən, 5000 manatdan 10000 manatadək cərimə, iki ilədək müddəti azadlığın məhdudlaşdırılması və ya iki ilədək müddəti azadlıqdan məhrumetmə cəzası ilə cəzalandırılır.
Əgər bu əməl internet informasiya ehtiyatlarından istifadə etməklə, yetkinlik yaşına çatmayan şəxslərdən yararlanmaqla və ya bir qrup şəxs tərəfindən həyata keçirilərsə, sanksiya daha sərt tətbiq edilir. Belə hallarda, cəza 10000 manatdan 15000 manatadək cərimə, iki ildən üç ilədək azadlığın məhdudlaşdırılması və ya iki ildən üç ilədək azadlıqdan məhrumetmə şəklində müəyyən edilir.
Cinayət Məcəlləsinin həmin maddəsinə əsasən, "xeyli miqdar" dedikdə, 50000 manatdan yuxarı, lakin 200000 manatdan artıq olmayan məbləğ nəzərdə tutulur. "Külli miqdar" isə 200000 manatdan 500000 manatadək məbləğə aid edilir. 500000 manatdan yuxarı məbləğ "xüsusilə külli miqdar" kimi təsnif olunur".
Hüquqşünasın sonda qeyd etdi ki, bu kimi qanunsuz əməllərlə qarşılaşmış şəxslər mütləq şəkildə Azərbaycan Respublikasının Daxili İşlər Nazirliyinə müraciət etməlidirlər. Bu, həm vurulmuş zərərin həm də törədilmiş qanunsuzluğun cəzalandırılmasını təmin etmək üçün vacibdir.
Elnurə Kərimova
07:54 01.01.2025
Oxunuş sayı: 8979
