Avstriyada Azərbaycan Diasporası Dünya Azərbaycanlılarının Həmrəylik Gününü qeyd etdi
Avstriya Respublikasının mədəniyyət paytaxtı sayılan Salzburg şəhərində fəaliyyət göstərən Azərbaycan Evində Diasporla iş Üzrə Dövlət Komitəsinin dəstəyi ilə Dünya Azərbaycanlılarının Həmrəylik Günü qeyd olundu.
Crossmedia.az xəbər verir ki, tədbiri giriş sözü ilə açan Avstriya Azərbaycanlıları Cəmiyyətinin və Salzburg Azərbaycan Evinin rəhbəri Fərid Əzizov 25 dekabr 2024-cü il tarixində “Azərbaycan Hava Yolları” aviaşirkətinin J2-8243 nömrəli Bakı-Qrozni reysini yerinə yetirən “Embraer 190” təyyarəsinin Aktau şəhərində qəzaya uğraması nəticəsində dünyasını dəyişən soydaşlarımızdan və Azərbaycanın qəhrəman pilotlarının insanları xilas etmək üçün göstərdikləri şücaətdən danışdı. Daha sonra qəzada dünyasını dəyişən soydaşlarımızın xatirəsinə hörmət əlaməti olaraq 1 dəqiqəlik sükut elan edildi.
Salzburg Azərbaycan Evində Dünya Azərbaycanlılarının Həmrəylik Günü münasibəti ilə gələn qonaqları təbrik edən diaspora sədri bildirdi ki, bu, əsl həmrəylik nümunəsidir; bir anda insanlar bir yerə toplaşır və hər an dünyanın harasında yaşamalarından asılı olmayaraq, vətənlərinin doğma Azərbaycanın yanında olduqlarını sübut edirlər.
Bu həmrəylik günü münasibətilə hər bir soydaşımızı təbrik edən diaspora sədri tədbiri açıq elan etdi.
Tədbir boyu gələn qonaqlara müxtəlif təamlar təqdim olundu. Qonaqlar arasında Azərbaycanlı soydaşlarımızla bərabər Avstriya vətəndaşları da iştirak edirdilər. Avstriyalı qonaqlar da Azərbaycan haqqında xoş təəssüratlarından söz açırdılar.
Təbii ki, tədbirdə balacaların sevimlisi, Yeni il atributu olan Şaxta Baba da öz hədiyyələri ilə balaca qonaqlarımızı sevindirdi. İlk öncə onlar yeni il və Azərbaycanla bağlı şeirlər və mahnılar oxudular və daha sonra Şaxta Baba onlara bir-birindən gözəl hədiyyələr təqdim etdi.
Tədbirin sonunda qonaqlarla birlikdə xatirə şəkilləri çəkdirildi.
14:30 31.12.2024
Oxunuş sayı: 11370
