Moldova Zelenskinin təyyarəsinə hücum təhlükəsini təkzib etdi
Ukrayna Prezidenti Volodimir Zelenskinin təyyarəsinin Kişinyovdan uçuşu zamanı dron tərəfindən təhlükəyə məruz qalması barədə məlumat təsdiqlənməyib.
Crossmedia.az xəbər verir ki, “TASS” bu barədə məlumat yayıb.
Moldova parlamentinin spikeri, hakim “Fəaliyyət və Həmrəylik” partiyasının nümayəndəsi İqor Qrosu bildirib ki, Zelenskinin təyyarəsi dron Moldova hava məkanını tərk edənədək yerdə olub və uçuş həyata keçirməyib.
“Zelenskinin təyyarəsi yerdə idi, uçmamışdı. Dron hava məkanımızı tərk etdikdən sonra onun təyyarəsi havaya qalxdı”, - deyə Qrosu bildirib.
Sentyabrın 9-da Norveçin Baş naziri Qaar Stere Zelenskini Norveç kralı V Haraldla vida mərasiminə aparan təyyarənin sentyabrın 8-də Moldovadan uçarkən dron tərəfindən “az qala vurulduğunu” açıqlamışdı. O, məlumatın mənbəyini və dronun təyyarəyə nə qədər yaxın olduğunu dəqiqləşdirməmişdi.
Sentyabrın 10-da “Telegraph” nəşri prezidentin təyyarəsinə dron təhlükəsinin şişirdildiyini yazıb.
Moldova hökumətinin sözçüsü Dumitru Çiorici isə ölkənin hava məkanının “uçan təyyarələri qorumaq məqsədilə” bağlandığını bildirib. Onun sözlərinə görə, bu səbəbdən üç uçuş gecikdirilib və dörd təyyarənin ölkəyə gəlişi təxirə salınıb.
Daha əvvəl Rusiya Dövlət Duması Norveç baş nazirinin Zelenskinin təyyarəsinə təhlükə olması barədə açıqlamasına münasibət bildirib.
20:47 10.09.2026
Oxunuş sayı: 40
