Xarici maliyyə qalmaqalı böyüyür: Farajdan gözlənilməz açıqlama
Böyük Britaniyada “Reform UK” partiyasının lideri Naycel Farac partiyaya xarici maliyyənin yönləndirilməsi ilə bağlı müzakirədən xəbərsiz olduğunu bildirib.
Crossmedia.az xəbər verir ki, “BBC” bu barədə məlumat yayıb.
Farac partiyanın keçmiş aparat rəhbəri Den Cuks və keçmiş siyasət rəhbəri Ceyms Orrun xarici maliyyənin partiyaya ötürülməsi ilə bağlı müzakirələrdən sonra vəzifələrindən uzaqlaşdırılması fonunda açıqlama verib.
Farac “BBC”yə müsahibəsində sözügedən söhbəti dinləmədiyini və müzakirə zamanı səsləndirilən təklifdən xəbərsiz olduğunu deyib. O, artan təzyiqlər fonunda ailə üzvlərinin də onu vəzifəsindən istefa verməyə çağırdığını bildirib.
“Verbatim Investigations” və “Channel 4 News” tərəfindən aparılan gizli araşdırma zamanı Farac və “Reform UK”nin keçmiş aparat rəhbəri Den Cuksun iştirak etdiyi söhbət qeydə alınıb. Müzakirə zamanı ABŞ-dən olan donorun Böyük Britaniyada yaşayan oğlu vasitəsilə partiyaya 500 min funt sterlinq ianə verməsi ehtimalı gündəmə gətirilib.
Böyük Britaniyanın seçki qanunvericiliyinə əsasən, siyasi partiyalara ianə edən şəxslər ölkədə seçici kimi qeydiyyatda olmalı, yaxud ianə edən şirkət Böyük Britaniyada qeydiyyatdan keçməlidir. Bu səbəbdən xaricdən gələn vəsaitin Böyük Britaniya rezidenti vasitəsilə partiyaya ötürülməsi hüquqi suallar doğurur.
Təklif olunan 500 min funt sterlinqlik ianə gizli araşdırmanın bir hissəsi olduğundan faktiki olaraq həyata keçirilməyib. Buna baxmayaraq, təklifin müzakirə olunması “Reform UK” daxilində maliyyələşmə qaydalarına əməl edilməsi ilə bağlı suallar yaradıb.
Den Cuks hər hansı qanunsuzluğa yol vermədiyini bildirib. “Reform UK”nin keçmiş siyasət rəhbəri Ceyms Orr isə partiyanın daxili araşdırması ilə tam əməkdaşlıq edəcəyini açıqlayıb.
Farac partiyanın konfransı zamanı jurnalistlərin suallarını cavablandırarkən müzakirə olunan maliyyə sxeminin qanuni olub-olmadığını özü də sual etdiyini bildirib.
11:43 09.09.2026
Oxunuş sayı: 45
