Rusiyanın nüvə silahından istifadə etmək istəməsi onun intiharıdır
Rusiya ilə Ukrayna arasında davam edən müharibə fonunda Moskvanın nüvə silahından istifadə ilə bağlı xəbərdarlıqları yenidən gündəmə gəlir. Son dövrlərdə bu istiqamətdə səsləndirilən açıqlamalar təkcə ayrı-ayrı deputat və ictimai xadimlərlə məhdudlaşmır. Rusiyanın yüksək səviyyəli rəsmilərinin də nüvə silahından istifadə ehtimalı barədə xəbərdarlıqları beynəlxalq ictimaiyyətdə narahatlıq yaradır. Xüsusilə Rusiya-Ukrayna müharibəsinin uzanması və Moskva ilə Avropa-NATO münasibətlərinin gərgin olaraq qalması mümkün ssenarilərlə bağlı müzakirələri artırır. Bununla belə, nüvə silahının tətbiqi həm Rusiya, həm də Qərb üçün son dərəcə ağır nəticələrə səbəb ola biləcək addım hesab olunur. Bu səbəbdən Rusiyanın səsləndirdiyi nüvə ritorikasının real hərbi plan, yoxsa qarşı tərəfi çəkindirməyə yönəlmiş siyasi mesaj olduğu sualı aktuallığını qoruyur. Ekspertlər hesab edirlər ki, mövcud vəziyyətdə Moskvanın qarşısında nüvə silahına əl atmadan istifadə edə biləcəyi bir sıra digər təzyiq və hərbi vasitələr də mövcuddur.
Crossmedia.az-a açıqlamasında politoloq Aydın Quliyev bildirib ki, Rusiyadan zaman-zaman nüvə silahının tətbiqi ilə bağlı mesajların səsləndirilməsi müşahidə olunur: “Biz təəssüf ki, zaman-zaman Rusiyadan nüvə silahının tətbiqi ilə bağlı mesajlar eşidirik. Həm də bu, təkcə sıravi deputatlar və yaxud ictimai xadimlər tərəfindən yox, hətta bəzən ali rəhbərlikdə təmsil olunan şəxslərin də dilindən gəlir. Məsələn, Rusiyanın faktiki ikinci adamı sayılan Medvedevin dilindən də hətta bu xəbərdarlıq edilib. Amma belə xəbərdarlıqların olması təbiidir, çünki bu gün Ukrayna ilə Rusiyanın münasibətləri, eləcə də Rusiya, Avropa, NATO münasibətləri olduqca gərgin olduğu üçün istənilən bir ssenari nəzəri olaraq mümkün görünür. O cümlədən də Rusiyanın NATO ölkələrinə nüvə zərbəsi endirməsi. Amma fikrimcə, hələlik hadisələr, proseslər bu həddə qədər gəlib çatmayıb. Əvvəla, Rusiya iqtisadi, siyasi və hərbi nöqteyi-nəzərdən bütün potensialı tam tükənmiş həddə gəlib düşməyib. Yəni nüvə silahından istifadə hələlik Rusiya üçün son zərurət anlayışı səviyyəsində bərqərar olunmayıb. Digər bir tərəfdən, Ukraynada gedən müharibədə nə Rusiya əhəmiyyətli dərəcədə üstələyə bilir ərazidə gedən döyüş əməliyyatları nöqteyi-nəzərindən, nə də Ukrayna üstələyə bilir. Digər tərəfdən, Rusiyanın əleyhinə olan Avropa-NATO düşərgəsində birlik yoxdur.
Politoloq qeyd edib ki, eyni zamanda hərbi taktika metodologiyasından yanaşsaq, hələlik qabaqda Rusiyanın istifadə eləyə biləcəyi müəyyən mərhələlər var, aralıq mərhələlər: "Xüsusilə də enerji infrastrukturlarına bundan sonra zərbələr endirilməsi — hansı ki, biz hələlik bunu görməmişik, mülki obyektlərə zərbələrin endirilməsi, hətta sıx əhali yaşayan şəhərlərə zərbələrin endirilməsi kimi praktikada mümkün olan təzahürləri hələ biz görməmişik. Bütün bunlar baş vermədiyi zamanda birdən-birə Rusiyanın nüvə silahına əl atacağı o qədər inandırıcı deyil. Ona görə də nüvə silahının tətbiqi ilə bağlı verilən bəyanatları daha çox çəkindirici xəbərdarlıq kimi qəbul eləmək daha düz olardı. Eyni zamanda, hətta bu günlərdə, inansaq, Trampın belə bir bəyanatı olmuşdu ki, Rusiyanın hansısa NATO üzvünə zərbə endirəcəyi — nüvə zərbəsi endirəcəyi ilə bağlı məlumatlar ciddi deyil, mən bunlara inanmıram. Hər halda Trampın da sözünə mötəbər yanaşsaq, Rusiyanın hansısa bir Avropa ölkəsinə nüvə zərbəsi endirməsi fikri ciddi görünmür. Ona görə ki, bu artıq bütün NATO-nun, o cümlədən də Amerikanın nüvə arsenalının tam şəkildə Rusiyanın üzərinə yeriməsi üçün başlanğıc ola bilər. Ona görə Rusiyanın təxminən intihara bərabər belə bir addım atması hələ inandırıcı deyil”.
Zeynəb Həsən
15:30 31.08.2026
Oxunuş sayı: 43
