“Porşe” sahiblərinin diqqətinə: Azərbaycan avtomobil bazarında nə baş verir?
Qlobal avtomobil sənayesi bu gün istehlakçı rəftarı və texnoloji yeniliklərin formalaşdırdığı böyük bir keçid dövrünü yaşayır. Ənənəvi güc və status simvolları yerini getdikcə qənaətcillik, rəqəmsal infrastruktur və ekoloji səmərəlilik kimi amillərə verir. Elektrikli nəqliyyat vasitələrinin populyarlaşması və yeni qlobal oyunçuların bazara daxil olması həm dünya, həm də Azərbaycanın daxili bazarında rəqabət qaydalarını yenidən yazır. Bu tendensiya, yaxın gələcəkdə avtomobil seçimində prioritetlərin köklü şəkildə dəyişəcəyindən xəbər verir.
Məsələ ilə bağlı nəqliyyat eksperti Adil Nəbiyev Crossmedia.az-a açıqlama verib: "Məncə, bunun əsas səbəbi avtomobil bazarında alıcıların tələblərinin sürətlə dəyişməsidir. Əgər əvvəllər avtomobil seçərkən əsas diqqət mühərrikin gücünə, markanın nüfuzuna və görünüşünə yönəlirdisə, bu gün insanlar daha çox istifadə xərclərinə, təhlükəsizlik imkanlarına, rahatlığa və müasir texnoloji həllərə üstünlük verirlər. Elektriklə işləyən avtomobillər artıq yalnız ətraf mühitə daha az təsir göstərən nəqliyyat vasitəsi kimi deyil, həm də gündəlik istifadə üçün daha sərfəli seçim kimi qəbul olunur. Onların enerji sərfiyyatı daha az xərc tələb edir, texniki qulluq ehtiyacı aşağı olur və mühərrik quruluşu daha sadə olduğundan təmir xərcləri də azalır. Bundan başqa, bu avtomobillərdə sürücüyə kömək edən təhlükəsizlik sistemləri, məsafədən yenilənən idarəetmə proqramları və müasir idarəetmə imkanları alıcıların marağını artırır”.
O bildirib ki, digər mühüm səbəb isə Çin istehsalçılarının bazarda sürətlə güclənməsidir: “Onlar münasib qiymətə yüksək keyfiyyət, zəngin avadanlıq, uzun hərəkət məsafəsi və müasir imkanlar təqdim etdikləri üçün ənənəvi Avropa, Yaponiya və Amerika markaları ilə ciddi rəqabət aparırlar. “Porşe” başda olmaqla bəzi tanınmış markaların satışlarının azalması da bu dəyişikliklərin nəticəsidir. Azərbaycanda da oxşar vəziyyət müşahidə olunur. Son illərdə elektrik və hibrid avtomobillərə maraq əhəmiyyətli dərəcədə artıb. Buna dövlət tərəfindən tətbiq edilən güzəştlər, istifadə xərclərinin aşağı olması və münasib qiymətə müasir avtomobillərin bazara daxil olması təsir göstərir. Hesab edirəm ki, yaxın illərdə bu meyl daha da güclənəcək və avtomobil bazarında əsas üstünlük mühərrikin həcmi ilə deyil, təhlükəsizlik, qənaətcillik, rahatlıq və müasir texnoloji imkanlarla müəyyən ediləcək".
Turqut Ansari
13:30 13.07.2026
Oxunuş sayı: 56
