Şərhçidən fərqli yanaşma: Ermənistandakı seçkilərin nəticəsini şərh edərkən harada səhv edirik?
Ermənistanın "Hraparak" nəşrinin məlumatına görə, ölkədə prezident kürsüsü uğrunda hakimiyyət daxilində mübarizə başlayıb. Bildirilib ki, Prezident Vaaqn Xaçaturyanın səhhətində ciddi problemlər var və səlahiyyət müddəti başa çatana qədər öz kreslosunda qala bilməyəcək.
Prezident 2022-ci ildə 7 illik müddətə seçilib. Xaçaturyanın yerinə baş nazirlik aparatının rəhbəri Arayik Arutyunyan, parlamentin spikeri Alen Simonyan və xarici işlər naziri Ararat Mirzoyan əsas namizədlərdir.
Ermənistanda hakimiyyət daxilində və siyasi arenada baş verən son proseslər regionun gələcək mənzərəsi baxımından ciddi suallar doğurur. Xüsusilə, prezident seçkiləri nəticəsində qonşu ölkələrlə münasibətlərin hansı istiqamətdə dəyişə biləcəyi və bu dəyişikliyin regionun ümumi sabitliyinə necə təsir edəcəyi hazırda analitiklərin diqqət mərkəzindədir. Cənubi Qafqazda dayanıqlı sülhün və regional təhlükəsizliyin təmin olunması istiqamətində İrəvanın atacağı hüquqi və siyasi addımlar dövlətlərarası münasibətlərin gələcək xəttini müəyyənləşdirir.
Ermənistan daxilindəki vəziyyət barədə siyasi şərhçi Elçin Alıoğlu Crossmedia.az-a danışıb: “Ermənistanda keçirilmiş parlament seçkilərinin nəticələrini şərh edərkən, əfsuslar olsun ki, biz emosional səhvə yol veririk. Bu səhv nədən ibarətdir? Ya pafosa qapılaraq hər şeyin gözəl olduğunu deyirik, ya da pessimizmə qapılaraq hər şeyin pis olacağını vurğulayırıq. Xeyr, biz Ermənistanda kimin hakimiyyətə gəlməsini, kimin hakimiyyətdə olmasını və kimin nə edəcəyini düşünməli deyilik. Biz sülh müqaviləsini konkret fərdlərlə və konkret individlərlə imzalamırıq. Biz sülh müqaviləsini Ermənistan xalqı ilə də imzalamırıq. Bu sülh müqaviləsi Ermənistan dövləti ilə imzalanır. Sülh müqaviləsi özündə kiçik təfərrüatları ehtiva edir. Bunlar delimitasiya, demarkasiya, kommunikasiyaların bərpası, diplomatik tanınma, qarşılıqlı fəaliyyət və ən əsası Ermənistanda revanşizm və şovinizm cərəyanlarına son qoyulmasıdır. Eyni zamanda Ermənistan Konstitusiyasının preambulasında və 14-cü maddəsində olan, Azərbaycana qarşı ərazi iddialarını ehtiva edən bəndlərin götürülməsidir. Bu, təbii ki, ermənilər üçün çətin və müşkül işdir. Çünki Ermənistan parlamentində Ermənistanın baş naziri Nikol Paşinyanın başçılıq etdiyi “Mülki Müqavilə” partiyası konstitusional çoxluğa malik deyil. Belə ki, “Mülki Müqavilə” partiyası 68 mandata sahib olsaydı, konstitusional dəyişikliklərlə bağlı referendumun keçirilməsi haqqında qanun layihəsini icraata çıxara bilərdi. Lakin “Mülki Müqavilə”nin hazırda 64 mandatı olduğuna görə, bu konstitusional təşəbbüs mümkün deyil. Və təbii ki, Paşinyan bundan istifadə edərək prosesi mümkün qədər uzatmağa çalışacaq".
O bildirib ki, Ermənistandakı parlament seçkilərinin dövlətlərarası münasibətlərə təsiri artıq özünü göstərir: "Beelə ki, Bakı və İrəvan arasında kommunikasiyalar artır, bu kommunikasiyaların intensivliyi çoxalır, qarşılıqlı əlaqələr güclənir, əlaqələrin müstəvisi və dərinliyi yüksəlir. yni zamanda Ermənistanın qonşu ölkələrlə – İranla, Türkiyə ilə, Gürcüstanla münasibətlərində yeni mərhələ başlayır. Ermənistan rəhbərliyi birmənalı olaraq Rusiyanın forpostu statusundan çıxmağı və Qərblə, daha doğrusu Avropa İttifaqı ilə münasibətləri intensivləşdirməyə istiqamətlənmiş siyasət yürüdür.
Amma burada bir qədər blef var. Çünki Ermənistan rəhbərliyi vətəndaşlarına Avropa İttifaqına (Aİ) üzvlük kimi vədlər verir. Bu isə yaxın onilliklər ərzində mümkün deyil. Birincisi ona görə ki, Aİ İran İslam Respublikası ilə həmsərhəd olmaq istəməz. İkincisi, Aİ özünə qonşu olmayan, coğrafi baxımdan həmsərhəd olmayan ölkələrin sırasına daxil edilməsini prosedur baxımından demək olar ki, müşkül bir məsələyə çevirib. Ona görə də Ermənistanın Aİ-yə gedən yolu birmənalı olaraq Bakı və Ankara ilə münasibətlərin normal həddə çatdırılmasından başlayır. İrəvan bunu anlayır. Nikol Paşinyan bir neçə dəfə bəyan edib ki, Ermənistanın təhlükəsizliyinin təminatçıları Azərbaycan və Türkiyədir. Bu bəyanatlar təsadüfi deyil. Bu, o deməkdir ki, Azərbaycan və Ermənistan arasında münasibətlər normal, sivil qaydada olarsa, bizim münasibətlərin normallaşması üçün nə kənar müdaxilə, nə kənar vasitəçi, nə moderator, nə də mediator gərəkdir. Bu, çox yaxşı bir haldır. Artıq iki ilə yaxındır ki, sülhə yaxın prosesdə yaşayırıq. Və bunu dayanıqlı sülhə çevirmək, Cənubi Qafqazı vahid regiona döndərmək üçün hər iki tərəf aktiv addımlar atmalıdır. Azərbaycan bu addımları atır, növbə indi Ermənistandadır".
Ayxan İbişov
17:14 22.06.2026
Oxunuş sayı: 58
