Pəncərə qarşısında durarkən diqqətli olun- Ekspert çağırış etdi
Bakıda azyaşlının ölümü ilə nəticələnən faciəli hadisə baş verib. Paytaxtın Nizami rayonunda 11 yaşlı qız yaşadığı binanın yeddinci mərtəbəsindən yıxılaraq həyatını itirib.
İlkin məlumata görə, 2015-ci il təvəllüdlü L.A. Bəxtiyar Nuriyev küçəsində yerləşən yaşayış binasında evlərinin eyvanından yıxılıb. Faktla bağlı araşdırmalara başlanılıb, hadisənin bütün təfərrüatları rayon prokurorluğu tərəfindən araşdırılır. Bəs bu cür halların yaşanmasına səbəb nələrdi?
Məsələ ilə bağlı təhlükəsizlik üzrə ekspert İlkin Məmmədkərimov Crossmedia.az-la öz fikirlərini bölüşüb: "Təəssüf ki, bu cür hadisələrə mətbuatda tez-tez rast gəlirik. Xüsusilə azyaşlı və yeniyetmələrin hündürmərtəbəli binalardan yıxılması nəticəsində həyatını itirməsi ciddi narahatlıq doğuran məsələdir. Bu hadisələrin intihar, ehtiyatsızlıq və ya digər səbəblərlə baş verməsini müəyyənləşdirmək hüquq-mühafizə orqanlarının, prokurorluğun və polisin araşdırma predmetidir. Hər bir hadisə ayrıca və hərtərəfli şəkildə araşdırılmalıdır. Ümumilikdə isə belə halların qarşısının alınması üçün valideyn nəzarəti mühüm əhəmiyyət daşıyır. Xüsusilə 12 yaşına qədər olan uşaqların nəzarətsiz qalmaması vacibdir. Bəzən hətta böyüklər də diqqətsizlik səbəbindən bədbəxt hadisələrlə üzləşirlər. Məsələn, pəncərə qarşısında dayanarkən və ya paltar sərərkən ehtiyatsız davranış yıxılma ilə nəticələnə bilər. Bu baxımdan təhlükəsizlik qaydalarına ciddi əməl olunmalıdır. Pəncərələrdən həddindən artıq əyilmək, dayanıqsız əşyaların üzərinə çıxmaq və ya riskli hərəkətlər etmək təhlükəlidir. Eyni zamanda, hazırda azyaşlıların təhlükəsizliyini təmin etmək üçün pəncərələrə quraşdırılan xüsusi qoruyucu torlar və təhlükəsizlik sistemləri mövcuddur. Bu vasitələrdən istifadə uşaqların təsadüfən yıxılmasının qarşısını almağa kömək edir. Uşaqlar və yeniyetmələr təbii olaraq ətraf mühitə maraq göstərir, pəncərədən həyətə baxmağa və ya müxtəlif yerlərə çıxmağa çalışırlar. Buna görə də valideynlər onların davranışlarına diqqətlə nəzarət etməli, təhlükəsizlik qaydalarını izah etməli və ev şəraitində mümkün riskləri minimuma endirməlidirlər. Belə halların qarşısının alınmasında valideyn məsuliyyəti və təhlükəsizlik tədbirlərinin görülməsi əsas amillərdən biridir".
Elmir Heydərli
18:46 02.06.2026
Oxunuş sayı: 47
