Cəmi 44 il yaşadı, amma gülüşü hələ də yaşayır – Bəşir Səfəroğlu
Bu gün Azərbaycan səhnəsinin unudulmaz simalarından biri olan Bəşir Səfəroğlunun anadan olduğu gündür. Gülüşü ilə yadda qalan bu sənətkarın adı illər keçsə də, Azərbaycan teatr və kino tarixində xüsusi yer tutur.
1925-ci il martın 11-də Quba rayonunun Rustov kəndində dünyaya gələn Bəşir Səfəroğlu uşaqlıq və gənclik illərini çətin şəraitdə keçirib.
Maddi çətinliklər səbəbindən məktəbi yarımçıq qoymalı olub və erkən yaşlarından işləməyə başlayıb. Lakin bütün çətinliklərə baxmayaraq, sənətə olan sevgisi onu səhnədən uzaq salmayıb. Hələ gənc yaşlarında dram dərnəklərinə qatılaraq kiçik rollarla səhnəyə çıxıb.
İkinci Dünya müharibəsi onun həyatında ağır izlər buraxıb. Müharibədən kontuziya ilə qayıdan aktyor bir müddət danışmaqda çətinlik çəkib və eşitmə problemi yaşayıb.
Buna baxmayaraq, o, sənətdən vaz keçməyib. Teatr mühitinə yaxınlaşdıqca və səhnəyə qayıtdıqca nitqi tədricən bərpa olunub və o, yenidən tamaşaçı qarşısına çıxıb. Bu hadisə Bəşir Səfəroğlunun həyatında həm iradənin, həm də sənət sevgisinin gücünü göstərən dönüş nöqtələrindən biri sayılır.
Aktyor daha çox komik və satirik obrazları ilə məşhurlaşıb. Tamaşaçılar onun yaratdığı obrazlarda həm yumor, həm də həyatın incə ironiyasını görürdülər. Səhnədə yaratdığı personajlar sadə insanların xarakterini, gündəlik həyatın gülməli tərəflərini ustalıqla əks etdirirdi.
O, xüsusilə Azərbaycan musiqili komediyalarında canlandırdığı rollarla yadda qalıb və tamaşaçıların sevimlisinə çevrilib.
Bəşir Səfəroğlu təkcə teatr səhnəsində deyil, kinoda da maraqlı obrazlar yaradıb. Onun iştirakı ilə çəkilən filmlərdən ən məşhurları arasında “Ulduz” və “Əhməd haradadır?” filmləri var. Bu ekran işlərində aktyorun yaratdığı obrazlar bu gün də Azərbaycan kino tarixinin yadda qalan komik rolları sırasında göstərilir.
1960-cı illərdə o, Azərbaycan Dövlət Filarmoniyasında fəaliyyət göstərən miniatür teatr kollektivində çıxış edərək, satirik səhnəciklər və monoloqlar ifa edirdi. Bu çıxışlar müasir dövrdə “stand-up” adlandırılan janra yaxın üslubda idi və tamaşaçılar tərəfindən böyük maraqla qarşılanırdı.
Sənət sahəsindəki uğurlarına görə Bəşir Səfəroğlu əvvəlcə “əməkdar artist”, daha sonra isə “xalq artisti” fəxri adlarına layiq görülüb.
Təəssüf ki, böyük gülüş ustasının ömrü uzun olmadı. O, 1969-cu ildə, cəmi 44 yaşında dünyasını dəyişdi. Aktyor Bakıda dəfn olunub və məzarı Birinci Fəxri Xiyabandadır.
Bəşir Səfəroğlunun qızı Afaq Bəşirqızı Crossmedia.az-a açıqlamasında demişdi:
"Təəssüf ki, mən atamı çox az görmüşəm. Çünki məni nənəm böyüdüb. Nənəm isə məni atama qısqanırdı. Nənəm rəhmətə getdikdən sonra atam illərlə çalışdı ki, mən onun yanında olum. Nəhayət, mən də onun yanında oldum. Bir il yarım sonra isə atam rəhmətə getdi.
Bütün bunlara baxmayaraq, bu il yarım ərzində ona bəlkə də cəmi 2-3 dəfə "ata" deyə bildim. Artıq 55 ildir ki, hər gün, 24 saatın ən azı üç saatını "ata" deyirəm. Bu gün isə fəxr edirəm ki, mənim atam Bəşir Səfəroğludur. Çünki hər sənətkar belə yaşaya bilmir. Hər sənətkar ölümündən sonra 55 il yaşaya bilmir".
Bu gün onun adı Azərbaycan teatr tarixində hörmətlə xatırlanır. Bakıda və bəzi bölgələrdə küçələrə, mədəniyyət ocaqlarına onun adı verilib. Səhnəyə gətirdiyi gülüş, yaratdığı obrazlar və tamaşaçıya bəxş etdiyi sevinc isə hələ uzun illər yaddaşlarda yaşayacaq.
Fatimə Məmmədova
11:15 11.03.2026
Oxunuş sayı: 58
