Bakıda saxlanılan erməni hərbi cinayətkarları ilə bağlı məhkəmə prosesinə dair qərəzli mövqelər sərgilənir- Partiya sədri
ATƏT PA-nın prezidenti Pere Xuan Pons Sampyetro Vyanada ATƏT Xarici İşlər Nazirləri Şurasının 32-ci iclasında çıxışı zamanı bildirib ki, ATƏT Parlament Assambleyası Azərbaycan və Ermənistan arasında davamlı sülhü dəstəkləməyə hazırdır.
"Azərbaycanda və Ermənistanda barışıq yolunda addımlar atılır. Bu, həqiqətən də, yaxşı xəbərdir və ATƏT PA davamlı sülhü dəstəkləməyə hazırdır", - o deyib.
Məlum olduğu kimi, ATƏT uzun illərdir ki, Azərbaycanla Ermənistan arasında sülh prosesinə xidmət edir. Daha doğrusu, çalışır. Ancaq bu cəhdlər o qədər də effektiv deyil.
ATƏT-in bundan sonra nə edə biləcəyi barədə Azad Vətən Partiyasının sədri Akif Nağı Crossmedia.az-a danışıb.
O bildirib ki, Avropa qurumlarının, o cümlədən ATƏT-in Azərbaycana qarşı ədalətli münasibətini heç vaxt görməmişik: "Onlar həmişə qərəzli mövqedən çıxış ediblər. Qarabağ məsələsində də Azərbaycana təzyiq göstərməyə çalışıblar. Bilirsiniz ki, ATƏT-in nəzdində yaradılmış Minsk qrupundan uzun illər əziyyət çəkmişik. Lakin, nəhayət, Azərbaycan Prezidentinin əsaslandırılmış mövqeyi və ardıcıl siyasi addımlarından sonra Minsk Qrupu bu yaxınlarda tamamilə ləğv edildi. Onların guya sülhü dəstəklədiklərini iddia etmələrinə baxmayaraq, illər boyu fəaliyyətlərində bunu müşahidə etməmişik. Uzun müddət onlar Azərbaycanı birtərəfli “sülhə məcbur etməyə” çalışdılar, lakin buna nail ola bilmədilər. Azərbaycan öz haqqını və hüququnu qorudu, torpaqlarını işğaldan azad etdi. Nəticədə onlar fakt qarşısında qaldılar və Azərbaycana istədikləri mövqeyi qəbul etdirə bilməyəcəklərini anladılar. İndi isə yeni regional reallıqdan çıxış edərək özlərini sülh tərəfdarı kimi göstərməyə çalışırlar. Amma əslində hələ də gizli planlarının olduğu görünür".
Müsahibimiz söyləyib ki, hazırda Bakıdakı erməni hərbi cinayətkarları ilə bağlı məhkəmə prosesinə dair qərəzli mövqelər sərgiləyirlər: "Onlar məsələyə başqa rakursdan yanaşaraq guya həmin şəxslərin “əsir” olduğunu iddia edirlər və Azərbaycan tərəfinə təzyiq göstərməyə cəhd edirlər. Eyni zamanda, Qarabağdan könüllü şəkildə çıxmış erməni əhalisinin geri qaytarılması məsələsini də gündəmdə saxlayırlar. Bu səbəbdən indiki şəraitdə, əgər, doğrudan da, regionda real sülhün tərəfdarıdırlarsa, qərəzli mövqelərindən geri çəkilməlidirlər. Hələlik isə onların bu istiqamətdə geri addım atdığını görmürük. Deməli, dedikləri yalnız söz olaraq qalır. Sadəcə, Azərbaycan xalqının gücü və iradəsi qarşısında mövqelərini dəyişməyə məcbur olurlar".
Sevinc Sultanlı
11:20 05.12.2025
Oxunuş sayı: 2836
