Azərbaycan ATƏT çərçivəsində konstruktiv əməkdaşlığa sadiqliyini təsdiqləyib
Azərbaycan təşkilatın işindəki mövcud çatışmazlıqlara baxmayaraq, ATƏT çərçivəsində konstruktiv qarşılıqlı əməkdaşlığa sadiq qaldığını təsdiqləyir.
Crossmedia.az xəbər verir ki, bu barədə Azərbaycan xarici işlər naziri Ceyhun Bayramov Vyanada ATƏT Xarici İşlər Nazirləri Şurasının (XİNŞ) 32-ci iclasında çıxışı zamanı bildirib.
"Biz ATƏT-in təhlükəsizliyə dair hərtərəfli konsepsiyası və ölkələrin geniş iştirakı sayəsində bu təşkilatın roluna inanmağa davam edirik", - nazir qeyd edib.
C.Bayramovun sözlərinə görə, aktuallığını qorumaq üçün təşkilat uyğunlaşmalı və fəaliyyətinin hiss olunan nəticələrini nümayiş etdirməlidir.
XİN rəhbəri vurğulayıb ki, yalnız birgə qərarlar real effekt gətirə bilər.
"Konsensus prinsipi həmişə bizim kollektiv səylərimizin fundamental xüsusiyyəti və qərar qəbuletmə prosesinin təməl daşı olaraq qalmalıdır. Bu anlayışla biz təşkilatın funksionallığı və effektivliyi problemlərinin aradan qaldırılmasında bütün ATƏT iştirakçı dövlətləri ilə konstruktiv qarşılıqlı əlaqəyə açıq qalırıq", - deyə nazir bildirib.
16:53 04.12.2025
Oxunuş sayı: 2044
