İƏT çərçivəsində əməkdaşlıq regional sabitliyə töhfə verir - Parlamentari
Azərbaycanın İrandakı səfiri Əli Əlizadə bildirib ki, Azərbaycan İqtisadi Əməkdaşlıq Təşkilatı (İƏT) çərçivəsində əməkdaşlığın gücləndirilməsinə sadiqdir. O, Xankəndidə keçirilən İƏT sammitinin tarixi əhəmiyyətini vurğulayaraq təşkilata üzv ölkələr arasında iqtisadi və humanitar sahələrdə inkişafın davam etdiyini qeyd edib. Səfir həmçinin Azərbaycan–İran münasibətlərində genişlənən əməkdaşlığı xüsusi olaraq önə çəkib.
İƏT çərçivəsində Azərbaycanın aktiv mövqeyi region ölkələri arasında iqtisadi və diplomatik əlaqələrin möhkəmlənməsinə ciddi töhfə verir. Xankəndidə keçirilən sammit isə Azərbaycanın regional əməkdaşlıqda aparıcı rolunu bir daha nümayiş etdirir.
Azərbaycanla İƏT arasında münasibətlərin inkişaf perspektivi barədə Milli Məclisin deputatı Nigar Məmmədova Crossmedia.az- a danışıb.
O bildirib ki, Azərbaycan İƏT çərçivəsində əməkdaşlığın gücləndirilməsinə daim töhfə verir və təşkilat daxilində iqtisadi, nəqliyyat və enerji sahələrində regional inteqrasiyanın dərinləşdirilməsini vacib hesab edir:
"Azərbaycan üzv olduğu bütün beynəlxalq təşkilatlar üçün uğurlu tərəfdaşdır. İƏT-də da bu qəbildəndir. Ölkəmiz 33 ildir bu təşkilatın üzvüdür. Təsadüfi deyil ki, Azərbaycan bu vaxta qədər sözügedən təşkilatın 3 zirvə toplantısına ev sahibliyi edib. 17-ci zirvə toplantısı bu ilin yayında Xankəndidə keçirildi. Bu, həm də ərazi bütövlüyü və suverenliyini bərpa edən Azərbaycanın İƏT platformasında mövqelərinin möhkəmlənməsi, yeni əməkdaşlıq imkanlarının dəyərləndirilməsi baxımından vacib idi. Məlum olduğu kimi, 2026-cı il Şuşa şəhəri “İƏT-in Turizm paytaxtı” elan edilib.
Azərbaycan İƏT-in işində həmişə fəal iştirak edir. Ümumiyyətlə, İqtisadi Əməkdaşlıq Təşkilatının əsas məqsədi üzv ölkələr arasında iqtisadi, ticarət, nəqliyyat və enerji sahələrində qarşılıqlı əməkdaşlığın təşviq olunması və dərinləşdirilməsidir. Azərbaycanın coğrafi mövqeyi, həyata keçirdiyi geoiqtisadi layihələr bir çox tərəfdaşlar kimi İƏT üzvlərinin də diqqətini cəlb edir. Xüsusilə, son vaxtlar nəqliyyat və logistika əməkdaşlığının aktuallaşdığı bir vaxtda Azərbaycanın potensialı daha geniş arealda xüsusi dəyərləndirilir. Təsadüfi deyil ki, Azərbaycan ərazisindən keçən Şərq-Qərb və Şimal-Cənub nəqliyyat dəhlizlərindən İƏT-ə üzv ölkələr də istifadə edir".
Parlamentari bildirib ki, Xankəndi zirvəsində İƏT-ə üzv ölkələr regional əməkdaşlığın gücləndirilməsi, iqtisadi inteqrasiyanın dərinləşdirilməsi baxımından səmərəli müzakirələr aparılıb: "Xüsusilə, işğaldan azad edilmiş bütün ərazilərin iqtisadi potensialı İƏT-ə üzv olan ölkələr üçün yeni əməkdaşlıq profilləri müəyyənləşdirir. İƏT çərçivəsində əməkdaşlıq həm siyasi, həm də iqtisadi cəhətdən regional sabitliyə və inkişafa nail olmağı hədəfləyir. Belə ki, siyasi cəhətdən əməkdaşlığın güclənməsi regional sülhə töhfə verir və inteqrasiyanı asanlaşdırır. Eyni zamanda, iqtisadi cəhətdən yeni ticarət imkanları yaranır. Beləliklə, regionun qlobal bazarlarla inteqrasiyasının təşviqi genişlənir. Nəticə etibarilə, əməkdaşlıq yolu ilə qarşılıqlı etimadı gücləndirməklə siyasi həmrəyliyin artırılmasına nail olunur.
İƏT-ə üzv ölkələr həm də BMT və İslam Əməkdaşlıq Təşkilatının timsalında beynəlxalq arenalarda bir-birini dəstəkləyərək mövqelərin gücləndirilməsini təmin edir".
Ülvi Zahidov
12:49 04.12.2025
Oxunuş sayı: 3180
