MDB Beynəlxalq Film Festivalı həm də regional dialoqa xidmət edəcək - RƏY
Mədəniyyət sahəsi ölkələrin beynəlxalq əlaqələrində və ictimai həyatında önəmli rol oynayır. Xüsusilə kino sənayesi həm bədii, həm də iqtisadi baxımdan ciddi təsirə malikdir. MDB-yə üzv dövlətlər arasında mədəni və humanitar əməkdaşlığın gücləndirilməsi məqsədilə beynəlxalq film festivalının təşkili nəzərdə tutulur. Dövlətlərarası Humanitar Əməkdaşlıq Fondunun icraçı direktoru Tahir İxanovun sözlərinə görə, belə tədbirlər üzv ölkələrin kino sənayesinin inkişafına təkan verir və regional mədəniyyətin dünyaya tanıdılmasına imkan yaradır. Bu təşəbbüs kino istehsalçılarının bir-biri ilə təcrübə mübadiləsi aparmasına və MDB ölkələrində müasir kino istehsalının səviyyəsinin yüksəlməsinə böyük töhfə verəcək.
Mövzu ilə bağlı Milli Məclisin deputatı Ülviyyə Həmzəyeva Crossmedia.az-a bildirib ki, MDB-yə üzv dövlətlərin beynəlxalq film festivalının təsis edilməsi barədə məlumat Dövlətlərarası Humanitar Əməkdaşlıq Fondunun icraçı direktoru Tahir İxanov tərəfindən Laçında keçirilən “MDB ölkələrində müasir kino istehsalının inkişafı” adlı dəyirmi masada açıqlanıb.
Deputat qeyd edib ki, bu təşəbbüs regionun mədəni və humanitar əməkdaşlığında yeni mərhələnin başlanğıcı kimi dəyərləndirilə bilər: "Festivalın məhz Laçında elan olunması Azərbaycanın mədəni diplomatiyada artan rolunu və işğaldan azad olunmuş ərazilərin yenidən mədəni mərkəzə çevrilməsi siyasətini nümayiş etdirir".
Ü. Həmzəyeva vurğulayıb ki, beynəlxalq festival MDB ölkələri arasında mədəni inteqrasiyanı gücləndirəcək, ortaq humanitar dəyərlərin təbliği və xalqların bir-birini daha yaxından tanıması üçün mühüm platforma yaradacaq: "Bu layihə həm də Dövlətlərarası Humanitar Əməkdaşlıq Fondunun mədəni əlaqələri genişləndirmək istiqamətində atdığı strateji addımlardan biridir".
Müsahibimiz əlavə edib ki, təşəbbüs kino sənayesinin inkişafı baxımından da böyük əhəmiyyət daşıyır: "Festival MDB ölkələri arasında birgə film istehsalını, texniki və yaradıcı təcrübə mübadiləsini, yeni layihələrin və investisiya imkanlarının artmasını təşviq edəcək. Eyni zamanda gənc kinematoqrafçılar üçün geniş təqdimat və əməkdaşlıq imkanları açacaq".
Ü. Həmzəyeva qeyd edib ki, Azərbaycan üçün bu təşəbbüs xüsusi strateji dəyər kəsb edir: "Laçında belə bir layihənin elan olunması azad olunmuş ərazilərdə mədəni həyatın bərpasının artıq real mərhələyə keçdiyini göstərir və bu ərazilərin gələcəkdə beynəlxalq tədbirlər üçün cəlbedici məkana çevrilə biləcəyini nümayiş etdirir. Festivalın ölkəmizdə keçirilməsi Azərbaycanın kreativ sənayelər üzrə regional liderliyini möhkəmləndirə bilər. Beynəlxalq tədbirlər turizm, iqtisadi canlanma və ölkələrin qlobal imici üçün də faydalıdır. Festival yüzlərlə qonağı, kino nümayəndələrini və media təmsilçilərini bir araya gətirir, təşkil olunduğu şəhərin tanıdılmasına və iqtisadi aktivliyinə töhfə verir".
Parlamentari fikrini tamamlayaraq bildirib: "MDB Beynəlxalq Film Festivalı regionun humanitar, mədəni və yaradıcı mühitində yeni imkanlar açacaq, dövlətlərarası əməkdaşlığı gücləndirəcək və Azərbaycan üçün mədəni diplomatiya baxımından əlavə strateji üstünlüklər yaradacaq. Bu təşəbbüs yalnız kino sənətinə deyil, həm də regional dialoqa və qarşılıqlı etimada xidmət edəcək".
Mehriban Yariyeva
11:11 04.12.2025
Oxunuş sayı: 2685
