Regionda yeni geosiyasi reallıqları yaranması Aİ-nin Azərbaycanla dialoqda yanaşmasını dəyişməyə məcbur etdi - RƏY
Avropa İttifaqının xarici işlər və təhlükəsizlik siyasəti üzrə ali nümayəndəsi Kaya Kallas İrəvanda keçirilən "Avronest" Parlament Assambleyasının 12-ci plenar sessiyasının iştirakçılarına ünvanladığı müraciətdə deyib: "Bizim Azərbaycan və Ermənistan üçün uğur hekayəmiz də var. Avqustun 8-də Vaşinqtonda atılan tarixi addım regionu sabitliyə və uzunmüddətli sülhə yaxınlaşdırdı. Biz Ermənistan və Azərbaycan arasında münasibətlərin normallaşması prosesini dəstəkləyirik".
Son vaxtlar Avropa İttifaqı Azərbaycan və Ermənistan arasında münasibətlərin normallaşması prosesini dəstəklədiyini bəyan edir. Lakin bu zaman belə bir sual yaranır: Aİ bu prosesdə nə dərəcədə səmimidir? Axı bir vaxtlar Qərb ölkələrinin bəzi addımları regionda gərginliyin artmasına səbəb olmuşdu. İndi isə Aİ-nin sülhə yönəlik çağırışları həqiqətən səmimi niyyətin ifadəsidir, yoxsa sadəcə diplomatik bəyanatlardan ibarətdir?
Məsələ ilə bağlı Milli Məclisin deputatı Günay Ağamalı Crossmedia.az-a açıqlama verib:
"Avropa İttifaqının Xarici işlər və təhlükəsizlik siyasəti üzrə Ali nümayəndəsi Kaya Kallasın Azərbaycan və Ermənistan arasında münasibətlərin normallaşması ilə bağlı prosesləri dəstəklədiyini ifadə etməsi strateji baxımından olduqca əhəmiyyətli hadisədir. Çünki Avropa İttifaqının ölkəmizə qarşı siyasətində uzun müddət ikili standartların mövcudluğunu müşahidə etmişik. Ali qurum Ermənistana 30 ilə yaxın Azərbaycan torpaqlarını işğal altında saxlanılmasına dair nə siyasi, nə də hüquqi təzyiq göstərmədi. Əksinə, zaman - zaman işğalı stimullaşdıran qərarlar və yanaşmalar sərgiləndi ki, bu da öz növbəsində Bakı və Brüssel münasibətlərində dərin çatların yaranmasına gətirib çıxartdı.
Lakin 44 günlük Vətən Müharibəsindən sonra regionda yeni geosiyasi reallıqları yaranması Avropa İttifaqının Azərbaycanla dialoqda yanaşmasını dəyişməyə məcbur etdi. Bir müddət əvvəl Kaya Kallasın ölkəmizə rəsmi səfərə gəlməsi və regionla əlaqədar səsləndirdiyi fikirlər Avropa İttifaqının Cənubi Qafqazla bağlı strategiyasında yeni mərhələnin başlamasının göstəricisi idi. İndiki situasiyada, Kaya Kallas və digər Avropa rəsmilərinin sülh təşəbbüslərinə dəstək bəyanatları versələr də, bu tip ritorika çox zaman praktik addımlarla müşayət olunmur".
O bildirib ki, rəsmi Brüssel, həqiqətən, Azərbaycan və Ermənistan arasında sülhün bərqərar olmasını istəyirsə ilk növbədə Vaşinqton kimi qəti və prinsipal mövqe nümayiş etdirməlidir: " İrəvana yekun sülhə mane olan hüquqi prosesləri yerinə yetirmək üçün çağırışlar etməlidir, onları təşviq etməlidir. Yalnız belə olduğu təqdirdə verilən bəyanatların hüquqi çəkisi nəzərə çarpar."- deyə deputat bildirib
Beləliklə, Avropa İttifaqının Azərbaycan və Ermənistan arasında münasibətlərin normallaşması prosesinə dəstək bəyanatları regionda sülhə ümid yaratsa da, bu bəyanatların real nəticə verməsi üçün konkret və prinsipial addımların atılması vacibdir".
Gülbəniz Bayramova
18:10 31.10.2025
Oxunuş sayı: 2182
