ABŞ və Kanadada hava limanlarına kiberhücum edilib
ABŞ və Kanadada hava limanlarına kiberhücum edilib və HƏMAS mesajları paylaşılıb.
Crossmedia.az "Reuters"-ə xəbər verir ki, hakerlər ötən çərşənbə axşamı Kanada və ABŞ-də ümumilikdə yeddi hava limanının ictimai ünvan sistemlərini ələ keçirərək HƏMAS-ı tərifləyən və ABŞ prezidenti Donald Trampı tənqid edən mesajlar yayıblar.
Kanadanın Britaniya Kolumbiyası əyalətində yerləşən “Kelowna” Beynəlxalq Hava Limanında reklam xidmətinin qısa müddətə pozulduğu və sistemə icazəsiz məzmunun yerləşdirildiyi təsdiqlənib. Kanada Polisi məsələ ilə bağlı araşdırma aparıldığını, ancaq əlavə təfərrüatların açıqlanmadığını bildirib.
Viktoriya Beynəlxalq Hava Limanının sözçüsü hakerlərin ictimai ünvan sisteminə üçüncü tərəf proqram təminatı vasitəsilə daxil olduqlarını və bu yolla mesajlarla yanaşı musiqi də yayımladıqlarını açıqlayıb.
Hazırda həm Kanadada, həm də Amerikada baş verən bu hücumlarla bağlı araşdırmalar davam edir.
13:04 17.10.2025
Oxunuş sayı: 5798
