Son iki yüz ildə ilk dəfə olaraq biz torpaq itirmədik, əksinə, torpaqlarımızı geri aldıq - Deputat
Azərbaycan tarixində elə günlər var ki, həm kədər, həm də qürur doludur. 27 sentyabr da məhz belə günlərdən biridir. Bu gün biz bir tərəfdən İkinci Qarabağ Savaşında şəhidlik zirvəsinə ucalan qəhrəman övladlarımızı ehtiramla yad edirik, digər tərəfdən isə Vətənimizin azadlığı, bütövlüyü və şərəfi uğrunda başladığımız böyük mübarizənin, Zəfər yolunun başlanğıcını xatırlayırıq.
27 sentyabr 2020-ci ildə Azərbaycan xalqı tarixinin sınaq anında bir yumruq kimi birləşdi, dövlətinin, ordusunun və Ali Baş Komandanının ətrafında sıx birləşərək haqq savaşına qalxdı. 44 gün davam edən bu savaş təkcə torpaqlarımızın azad olunması deyil, həm də milli iradəmizin, qürurumuzun və gücümüzün bərpası idi.
Anım günü ilə bağlı Crossmedia.az-a açıqlama verən Milli Məclisin deputatı Arzuxan Əlizadə bildirib ki, 27 sentyabr İkinci Qarabağ Savaşında şəhidlik zirvəsinə ucalmış qəhrəman övladlarımızın anım günü olmasına baxmayaraq, həm də Azərbaycanın müasir tarixinin ən qürurverici günlərindən biridir:
"Həmin gün biz dövlət olaraq, millət olaraq, xalq olaraq 30 il işğal altında qalan torpaqlarımızı azad etmək üçün ayağa qalxdıq və 44 gün ərzində möhtəşəm bir qələbə qazandıq. Bu 44 gün ərzində keçilən yol Azərbaycanın zəfər dolu yolu oldu.
Şəhidlər verdik, qazilərimiz sağlamlıqlarından oldular. Amma uşaqdan böyüyə, ən yaşlı insanımıza qədər hər kəs orduya dəstək nümayiş etdirdi. Bütün xalq bir yumruq kimi birləşdi.
Siyasi baxışından, sosial mövqeyindən asılı olmayaraq hər kəs vətən uğrunda, işğaldan azad olmaq uğrunda mübarizəyə qoşuldu. 44 gün ərzində Azərbaycan Ordusu, qəhrəman Azərbaycan əsgəri bir addım belə geriyə çəkilmədi. Sonda torpaqlarımızın əhəmiyyətli hissəsini işğaldan azad etdik və 8 noyabrda Şuşanı azad etməklə Zəfərimizi taclandırdıq. Daha sonrakı mərhələdə keçirilən antiterror əməliyyatları nəticəsində isə 2023-cü ilin 19–20 sentyabr tarixlərində cəmi 23 saat davam edən lokal antiterror əməliyyatı ilə ərazilərimizi tam olaraq terrorçulardan və qanunsuz silahlı birləşmələrdən təmizlədik, dövlətimizin suverenliyini və ərazi bütövlüyünü tam bərpa etdik.
Beləliklə, 27 sentyabr həm də Qələbənin başlanğıc günü, milli qürurumuzun özümüzə qaytarıldığı gün kimi tariximizə həkk olundu. Bu beş il ərzində ölkəmizdə böyük işlər görüldü. 27 sentyabr anım günü deyəndə isə hər birimizin gözləri önünə o şanlı günlər gəlir.
Tariximizdə belə bir dövr olmamışdı. Azərbaycan xanlıqları, bəylikləri, Səfəvilər dövründə və ya daha sonrakı dönəmlərdə müharibələrə gediləndə arxada çox vaxt üsyanlar, narazılıqlar baş verirdi. Amma bu dəfə xalq bir oldu, sona qədər ordusunun, dövlətinin, Ali Baş Komandanın – Prezident İlham Əliyevin yanında oldu. Onun rəhbərliyi ilə Azərbaycan möhtəşəm uğura imza atdı.
30 illik işğal və məğlubiyyət sindromuna son qoyuldu. Başımız dik oldu, qürurumuz özümüzə qayıtdı. Lakin 27 sentyabra gedən yol da asan deyildi. Həmin günün qəhrəman oğul və qızlarını yetişdirmək, onları müasir texnika və silahlardan istifadə edə biləcək səviyyəyə çatdırmaq illər və böyük zəhmət tələb edirdi.
Azərbaycan müstəqilliyini yenicə bərpa etdiyi bir vaxtda təcavüzə məruz qaldı, ərazilərimizin 20%-i işğal edildi, bir milyona yaxın qaçqın və məcburi köçkün problemi yarandı. Yavaş-yavaş iqtisadiyyatımızı dirçəldib, dövlətimizi gücləndirdik. Diplomatik yolla torpaqlarımızı geri almağa çalışdıq, lakin beynəlxalq təşkilatlar, güclü dövlətlər, ATƏT-in Minsk qrupu Azərbaycanın haqq səsinə biganə qaldılar, bizi mövcud reallıqla barışmağa məcbur etmək istədilər. Amma xalqımız da, rəhbərlərimiz də bu məsələdə bir addım geri atmadılar.
Müstəqillik illərində həm ümummilli lider Heydər Əliyev, həm də Prezident İlham Əliyev Qarabağ məsələsində xalqın siyasi iradəsini qorudu, prinsipial mövqedən dönmədilər. Ordumuz müasir silahlarla təchiz olundu, hərbçilərimiz uzunmüddətli təlimlər keçdi, müasir texnologiyalara yiyələndi. Və nəhayət, 44 gün ərzində Ermənistanın keçilməz hesab etdiyi istehkamlar darmadağın edildi, düşmən ordusu məğlub oldu.
Ermənistanın arxasında dayanan qüvvələr – qonşu dövlətlər, Fransa başda olmaqla bəzi Qərb dairələri, müxtəlif muzdlular və terrorçu dəstələr belə bu məğlubiyyətin qarşısını ala bilmədi. Azərbaycan xalqının birliyi, Ordumuzun rəşadəti və Ali Baş Komandanın müdrik rəhbərliyi nəticəsində biz Qələbəyə nail olduq".
Deputat həmçinin 27 sentyabr ona görə qürur günüdür ki, son iki yüz ildə ilk dəfə olaraq biz torpaq itirmədik, əksinə, torpaqlarımızı geri alaraq ərazi bütövlüyümüz və suverenliyimiz tam bərpa olunduğunu bildirib.
"Bu gün Azərbaycan regionda yeni reallıqlar yaradıb. Zəngəzur dəhlizi kimi layihələr, kommunikasiya xətləri həm ölkəmiz, həm də region üçün böyük perspektivlər açır.
Biz şəhidlərimizə Allahdan rəhmət, qazilərimizə can sağlığı diləyirik. Azərbaycan Prezidentinə minnətdarlığımızı bildiririk ki, xalqı Zəfərə qovuşdurdu. 27 sentyabr – Anım və Qürur günü gələcək nəsillərə vətənpərvərlik dərsi, milli birliyin nümunəsi kimi yad edilməlidir"- deyə o qeyd edib.
Elmir Heydərli
15:58 27.09.2025
Oxunuş sayı: 19298
