Əliyev və Tramp arasında anlaşma iki ölkə arasında strateji tərəfdaşlıq üçün güclü zəmin yaradır – Deputat
Prezident İlham Əliyev çıxışında
vurğulayıb ki, Vaşinqton sammiti təkcə qlobal əhəmiyyət daşıyan tədbir deyil, həm
də Azərbaycan ilə ABŞ arasında münasibətlərin inkişafında mühüm dönüş nöqtəsidir.
Dövlət başçısının BMT-nin 80-ci sessiyasında səsləndirdiyi bu fikir Azərbaycanın
beynəlxalq arenada artan rolunu və nüfuzunu bir daha ortaya qoyur. İlham
Əliyevin yürütdüyü ardıcıl və peşəkar xarici siyasət nəticəsində Azərbaycan bu
gün qlobal məsələlərin müzakirəsində fəal iştirak edən, söz sahibi olan dövlətə
çevrilib. BMT-də keçirilən möhtəşəm tədbirdə ölkəmizə göstərilən hörmət və diqqət
bunun bariz nümunəsidir. Əgər 30 il əvvəl Azərbaycan yeni müstəqillik qazanmış,
beynəlxalq münasibətlərdə mövqeyi zəif bir ölkə idisə, bu gün artıq dünya dövlətlərinin
etibarlı tərəfdaşı və güvənilən tərəfi kimi tanınır.
Mövzu ilə bağlı Milli Məclisin
deputatı Tənzilə Rüstəmxanlı Crossmedia.az-a açıqlama verib: “Azərbaycan beynəlxalq
münasibətlər sistemində mühüm və fəal iştirakçılardan biri kimi çıxış edir.
Dövlətimizin apardığı uğurlu, çoxistiqamətli və tarazlaşdırılmış xarici siyasət
xətti Azərbaycanın həm regional, həm də qlobal miqyasda nüfuzunun artmasına şərait
yaradır. Bu baxımdan Prezident İlham Əliyevin BMT Baş Assambleyasının 80-ci
sessiyasında iştirak məqsədilə Amerika Birləşmiş Ştatlarının Nyu-York şəhərinə
etdiyi işgüzar səfər də ölkəmizin beynəlxalq arenadakı fəal mövqeyinin və
diplomatik fəallığının bariz nümunəsi kimi yadda qaldı. Nyu-Yorkda BMT Baş
Assambleyasının 80-ci sessiyası çərçivəsində keçirilən rəsmi qəbulda ABŞ
Prezidentinin dövlətimizin başçısı haqqında səsləndirdiyi xoş sözlər və dəyərli
fikirlər Prezident İlham Əliyevin beynəlxalq aləmdə artan nüfuzunun və qlobal
liderlik keyfiyyətlərinin yüksək qiymətləndirildiyini nümayiş etdirdi. Bu
fikirlər Azərbaycan liderinə və ölkəmizə göstərilən ehtiramın bariz təzahürü
kimi yadda qaldı. Ümumiyyətlə Azərbaycan-ABŞ münasibətləri uzun illər ərzində
müxtəlif mərhələlərdən keçib, zaman-zaman qarşılıqlı əməkdaşlıq və gərginlik
dalğaları ilə müşayiət olunub. Lakin Donald Trampın 2025-ci ildə yenidən ABŞ
Prezidenti seçilməsindən sonra bu münasibətlərin yeni mərhələyə qədəm qoyması
üçün real perspektivlər yaranıb. Prezident İlham Əliyev və Prezident Donald
Tramp arasında qarşılıqlı anlaşma və əməkdaşlıq iki ölkə arasında strateji tərəfdaşlıq
üçün güclü zəmin yaradır. Enerji təhlükəsizliyi, regional sabitlik, iqtisadi əməkdaşlıq
və terrorizmə qarşı mübarizə sahələrində ortaq maraqlar liderlər səviyyəsində
aparılan dialoqun səmərəliliyini və gələcəyə yönəlmiş mahiyyətini bir daha təsdiqləyir”.
Ayhan
21:30 26.09.2025
Oxunuş sayı: 5356
