Böyük Qayıdış prosesinin uğurla həyata keçirilməsi birbaşa mina təhlükəsinin aradan qaldırılmasından asılıdır - Deputat
Azərbaycan Respublikasının
Prezidenti İlham Əliyev BMT tribunasından çıxış edərkən bildirib ki,
postmünaqişə dövründə ölkənin qarşısında duran ən böyük humanitar problemlərdən
biri minaların yaratdığı təhlükədir. Dövlət başçısının sözlərinə görə, bu məsələ
azad edilmiş torpaqlara qayıdış prosesini ləngidən əsas maneələrdən biridir.
Belə ki, ikinci Qarabağ müharibəsindən 5 il keçməsinə baxmayaraq hələ də mina məsələsi
öz həllini tapmayıb. Bu məsələnin həlli yalnız Ermənistan tərəfinin dediklərinə
uyğun hərəkət etməsi ilə həll edilə bilər ki, sülh müqaviləsi imzalandıqdan
sonra minalar dövlətlər arasında mübahisə predmeti olmasın
Mövzu ilə bağlı Crossmedia.az-a
Milli Məclisin deputatı Cavanşir Paşazadə açıqlama verib: "Qələbədən bu
günə artıq beş il keçir. Bu müddət ərzində ölkəmiz azad edilmiş ərazilərdə mina
təmizləmə işlərini davam etdirir. Bu prosesdə bizə xarici ölkələr də müəyyən dəstək
göstərir və həmin təmizlik işlərində iştirak edirlər. Lakin bütün bu yardımlara
baxmayaraq, mina təhlükəsi hələ də cəmiyyətimiz üçün ciddi problem olaraq
qalır. Orada yaşayan insanlar, tikinti işlərində çalışanlar və heyvandarlıqla məşğul
olan əhali bu təhlükədən zərər görür. Hətta yaxın kəndlərdən gələn şəxslər də
minaya düşərək xəsarət alıblar. Hazırda qaçqınlarımızın əksəriyyəti doğma
torpaqlarına qayıtmağa hazırlaşır. Böyük Qayıdış prosesinin uğurla həyata
keçirilməsi isə birbaşa mina təhlükəsinin aradan qaldırılmasından asılıdır.
Çünki yolların çəkilməsi, aeroportların tikilməsi, mədəni, dini və iqtisadi
obyektlərin inşası Azərbaycanın öz vəsaiti hesabına həyata keçirilsə də,
minalar bu prosesin qarşısında əsas maneədir".
Cavanşir Paşazadə bildirib ki, Ermənistan
30 ilə yaxın müddətdə xaricdən aldığı ianələr hesabına həmin ərazilərə minalar
basdırıb: "Dövlətimizin dəfələrlə müraciət etməsinə baxmayaraq, təqdim
olunan mina xəritələri reallığa uyğun gəlmir. Bu isə onların apardığı siyasətin
yanlışlığını bir daha göstərir. Bütün bunlara baxmayaraq, Azərbaycan dövləti öz
gücü ilə mina təmizləmə işlərini davam etdirir. Əsas məqsəd köçkünlərin təhlükəsiz
şəkildə kəndlərə və qəsəbələrə qayıtması, kənd təsərrüfatı ilə məşğul olaraq
orada həyatlarını yenidən qurmasıdır. Bunun üçün ölkəmiz beynəlxalq ictimaiyyətdən
və dost dövlətlərdən maddi yardım deyil, mütəxəssis dəstəyi gözləyir".
Xumar
Emilqızı
21:05 26.09.2025
Oxunuş sayı: 5076
