KİV: Polşaya Rusiya dronlarının kütləvi girişi NATO üçün ciddi xəbərdarlıqdır
Sentyabrın 10-da on doqquz Rusiya dronu Polşaya daxil olaraq NATO hava məkanının ən böyük pozuntusunu həyata keçirib. Hadisə Rusiya-Ukrayna müharibəsinin başlanmasından bu yana, Alyansın şərq cinahında təhlükəsizliyi yoxlama cəhdi kimi qiymətləndirilir. Polşanın xarici işlər naziri Radosłav Sikorski hücumu NATO müdafiəsini sınamaq və alyansın öhdəliklərini yoxlamaq cəhdi kimi dəyərləndirib.
Crossmedia.az xəbər verir ki, hadisədən sonra Polşa Şimal Atlantika Müqaviləsinin 4-cü maddəsini işə salaraq müttəfiqlərlə məsləhətləşmələrə başlayıb, lakin təhlükə zamanı bütün üzv dövlətlərin müdaxiləsini nəzərdə tutan 5-ci maddənin tətbiqinə getməyib.
Son həftə ərzində bir çox Qərb liderləri Rusiyanın “təhlükəli” hücumunu qınayıb. NATO isə “Eastern Sentry” adlı yeni qarşısayıcı təşəbbüsü elan edərək inteqrasiya olunmuş hava müdafiəsi, kəşfiyyat paylaşımı və yeni hərbi resursların cəlbini planlaşdırır. Buna baxmayaraq, bəzi ekspertlər Alyansın reaksiyasını kifayət qədər effektli saymır. Ukrayna Prezidenti Volodimir Zelenski NATO-nu “hərəkətsizlikdə” ittiham edərək, Avropa ölkələrinin birgə hava müdafiə sistemi üzərində işləyərək “Avropaya effektiv hava qalxanı” yaratmalı olduğunu vurğulayıb.
Nicat Rüstəmzadə
23:17 22.09.2025
Oxunuş sayı: 4084
