Paşinyan: “Təəssüf ki, Üçüncü Respublikasının həyatı belə olmadı : blokada, müharibə, iqtisadi geriləmə, miqrasiya…”
“Bu gün Ermənistan Respublikasının müstəqilliyinin 34-cü ildönümünü qeyd edirik. 1991-ci il sentyabrın 21-də referendumda aşağıdakı sual qoyuldu: “Siz razısınızmı ki, Ermənistan Respublikası SSRİ tərkibindən çıxaraq müstəqil demokratik dövlət olsun?” Xalqımızın, seçicilərin 94 faizi “bəli” cavabını verdi və bununla da Ermənistanın Üçüncü Respublikası təsis olundu”.
Crossmedia.az xəbər verir ki, bu barədə Ermənistan Baş naziri Nikol Paşinyanın təbrik müraciətində bildirib.
“Referendumda iştirak edən və müstəqilliyə “bəli” deyən vətəndaşlar səsvermə anında nə haqqında xəyal qururdular? Belə statistika yoxdur, amma şübhəsiz ki, həmin soydaşlarımızı azad, sülhpərvər, firavan, xoşbəxt bir dövlət qurmaq təbii istəyi idarə edirdi.
Təəssüf ki, Üçüncü Respublikasının həyatı belə olmadı: blokada, müharibə, iqtisadi geriləmə, miqrasiya müstəqillik referendumunun arzularını reallığa çevirməyə imkan vermədi. Amma hətta Üçüncü Respublikanın yaşadığı ən çətin və faciəli günlərdə belə, həmin arzu bəlkə solğunlaşıb, amma vətəndaşlarımızın gözlərində, düşüncəsində və ruhunda heç vaxt sönməyib.
2025-ci il avqustun 8-də təsdiqlənmiş sülhlə həmin arzu yenidən Ermənistan Respublikasını doldurub və bizim borcumuz əvvəlcə onu qoruyub saxlamaq, sonra isə həyata keçirməkdir.
Əzabların və qurbanların içərisindən keçərək biz bu nöqtəyə gəldik və Dördüncü Respublikanın təsis olunması gündəliyi – arzunun gerçəkləşməsi imkanını bir daha heç vaxt əldən verməmək məsələsi məhz bununla bağlıdır.
Müstəqil, suveren, demokratik, sülhsevər, müdafiə olunan, inkişaf etmiş, azad və xoşbəxt Ermənistan, bax, yeni doğulmuş körpə kimi bizim qayğımızı gözləyir. Və biz hamımız, əziz xalq, Ermənistan Respublikasının əziz vətəndaşları, ona həm ata, həm ana olmalıyıq. Biz özümüzə həm ata, həm ana olmalıyıq və anlamalıyıq ki, 21-ci əsrin ilk rübündə taleyimizin sükanı, bax, həqiqətən bizim əlimizdədir. Və bu sükanı biz əlimizdən bir daha heç vaxt buraxmamalıyıq”, - deyə Paşinyan qeyd edib.
09:31 21.09.2025
Oxunuş sayı: 5560
