ADSEA: Su ehtiyatları artıq qlobal təhlükəsizliyin ən strateji elementlərindən biridir
Bu gün 2-ci Beynəlxalq Su Təsərrüfatı Konfransında toplaşmağımızın əsas səbəbi təkcə su ilə bağlı problemləri müzakirə etmək deyil, həm də onların həlli üçün birgə yol xəritəsini müəyyənləşdirməkdir. Çünki su ehtiyatları artıq sadəcə təbii sərvət deyil – qlobal təhlükəsizlik, davamlı inkişaf və insan rifahının ən strateji elementlərindən biridir.
Crossmedia.az xəbər verir ki, bunu Azərbaycan Dövlət Su Ehtiyatları Agentliyinin (ADSEA) sədri Zaur Mikayilov oktyabrın 11-də Bakıda keçirilən 2-ci Beynəlxalq Su Təsərrüfatı Konfransında çıxışı zamanı deyib.
O bildirib ki, dünyada suya tələbat sürətlə artır, iqlim dəyişmələri, əhalinin artımı, urbanizasiya və sənayeləşmə nəticəsində resurslar üzərində təzyiq daha da güclənir.
"Bu isə ölkələri yeni yanaşmalara və birgə hərəkətə məcbur edir. Liderlik isə burada əsas həlledici faktordur – yalnız strateji vizyona, çevik qərarlara və məsuliyyətli idarəetməyə əsaslanan liderlik bizi çətinliklərdən çıxara bilər. Azərbaycanın su siyasəti məhz bu prinsiplərə söykənir. Ölkəmizdə qəbul olunmuş milli su strategiyası yaxın onilliklər üçün qarşımıza aydın hədəflər qoyur; su ehtiyatlarının ədalətli və rasional idarə edilməsi, infrastrukturun müasirləşdirilməsi və rəqəmsal texnologiyaların tətbiqi, alternativ və dayanıqlı su mənbələrinin inkişafı, elm, innovasiya və beynəlxalq əməkdaşlığın gücləndirilməsi. Bu məqsədlə genişmiqyaslı layihələr həyata keçirilir. Yeni su anbarlarının tikintisi, suvarma sistemlərinin yenilənməsi, şəhər və kəndlərdə içməli su təminatının yaxşılaşdırılması istiqamətində mühüm addımlar atılır. Eyni zamanda, rəqəmsal idarəetmə platformaları vasitəsilə su balansı, sərfiyyat və itkilər real vaxt rejimində izlənir. Lakin bugünkü reallıq göstərir ki, ənənəvi mənbələr kifayət etmir. Ona görə də biz alternativ həllərə xüsusi diqqət ayırırıq – yağış sularının toplanması, təkrar istifadənin təşviqi, müasir duzsuzlaşdırma texnologiyalarının tətbiqi. Bu istiqamətdə beynəlxalq tərəfdaşlarla əməkdaşlıq bizim üçün olduqca önəmlidir", - deyə Z.Mikayılov qeyd edib.
O diqqətə çatdırıb ki, Azərbaycan transsərhəd sulara malik ölkə olduğu üçün ölkəmizi regional əməkdaşlıqda daha məsuliyyətli edir: "Biz inanırıq ki, səmərəli dialoq və qarşılıqlı etimad prinsiplərinə əsaslanan su diplomatiyası regionda sabitlik və tərəqqiyə xidmət edəcək. Qonşu ölkələrlə birgə layihələr, məlumat mübadiləsi və inteqrasiya olunmuş idarəetmə mexanizmləri bu istiqamətdə prioritetlərimizdəndir. Bugünkü çağırışlara cavab yalnız elm və texnologiyanın gücü ilə mümkündür. Agentlik olaraq biz universitetlərlə, elmi institutlarla, beynəlxalq ekspertlərlə əməkdaşlıq edir, yeni texnologiyaların tətbiqinə dəstək veririk. Su siyasəti yalnız dövlətin deyil, bütün cəmiyyətin məsuliyyətidir. Hər bir vətəndaş, hər bir müəssisə, hər bir təsərrüfat suya qənaət etməklə və məsuliyyətli istifadə etməklə bu liderliyin bir hissəsinə çevrilə bilər".
10:47 11.09.2025
Oxunuş sayı: 740
