Texasda daşqın faciəsi: 27 nəfər ölüb, onlarla uşaq itkin düşüb
ABŞ-nin Texas ştatının mərkəzi hissəsində baş verən güclü sel nəticəsində azı 27 nəfər həyatını itirib, onlarla insan itkin düşüb.
Crossmedia.az xarici mediaya istinadən bildirir ki, Kerr qraflığının şerif idarəsi sel sularının geri çəkilməsindən sonra bölgədən 800 nəfərin təxliyə edildiyini açıqlayıb. Hadisə San Antonio şəhərindən təxminən 137 kilometr şimal-qərbdə yerləşən Guadalupe çayı ətrafında qeydə alınıb. Daşqın zamanı Camp Mystic adlı yay düşərgəsində qalan 23-25 nəfərin, əsasən azyaşlı qızların itkin düşdüyü bildirilir. Qısa müddət ərzində çayın səviyyəsi 29 fut (təxminən 9 metr) yüksəlib.
ABŞ Milli Hava Xidməti Kerr qraflığında fövqəladə sel təhlükəsinin aradan qalxdığını, lakin San Antonio və Ostin bölgələri üçün şənbə günü saat 19:00-a qədər sel xəbərdarlığının qüvvədə qaldığını bildirib. Gün ərzində fasilələrlə yağış yağacağı gözlənilir. Hava Xidməti ötən cümə günü bölgəyə bir aya bərabər yağıntı düşdüyünü qeyd edib.
ABŞ Prezidenti Donald Tramp hadisə ilə bağlı açıqlamasında qeyd edib ki, federal hökumət vəziyyəti nəzarətdə saxlamaq üçün yerli və ştat rəsmiləri ilə əməkdaşlıq edir. “Melaniya və mən bu dəhşətli faciədən təsirlənən ailələr üçün dua edirik. Qəhrəman xilasedicilər hadisə yerində fədakarlıqla çalışırlar” – deyə Tramp sosial mediada bildirib.
Kerrville şəhərinin (Kerr qraflığının inzibati mərkəzi) rəhbəri Dalton Rays bildirib ki, daşqın çox sürətlə və qəfil baş verib. “Bu, çox qısa müddətdə, radarların belə öncədən göstərə bilməyəcəyi qədər tez baş verdi. Cəmi iki saatdan az bir müddətdə hər şey dəyişdi”, – deyə o qeyd edib. Texas Fövqəladə Hallar İdarəsinin rəhbəri V. Nim Kidd də bildirib ki, əvvəlcədən yağış proqnozu verilsə də, düşən yağıntının miqdarı gözləniləndən çox olub.
Qeyd edək ki, bu faciə 1987-ci ildə Guadalupe çayı üzərində baş vermiş bənzər hadisəni xatırladır. Həmin vaxt bir kilsə düşərgəsindən qayıdan avtobus və mikroavtobus daşqına düşmüş, nəticədə 10 yeniyetmə həyatını itirmişdi. O vaxt da yüzlərlə insan təxliyə olunmuşdu.
19:58 05.07.2025
Oxunuş sayı: 625
