İran XİN rəhbəri: Avropa ilə nüvə danışıqları mənasızdır
İranın xarici işlər naziri Abbas Əraqçı Avropa İttifaqının (Aİ) İranın nüvə proqramı ilə bağlı yeni danışıqların başlanmasına dair çağırışlarını kəskin şəkildə tənqid edib. Nazir bildirib ki, əgər bu danışıqların əsas məqsədi İranın nüvə proqramına son qoymaqdırsa, o zaman bu cür müzakirələrin heç bir əhəmiyyəti yoxdur.
Crossmedia.az xarici mediaya istinadən bildirir ki, Abbas Əraqçı bu fikirləri Aİ-nin diplomatik rəhbəri Kaya Kallasın bəyanatlarına cavab olaraq səsləndirib. Kallas İranla nüvə proqramı ətrafında danışıqların bərpasının vacibliyini vurğulayıb. Əraqçı isə bildirib ki, əgər Birgə Hərtərəfli Fəaliyyət Planı (JCPOA) komissiyasının koordinatoru hesab edirsə ki, bu danışıqların yeganə məqsədi İranın nüvə fəaliyyətlərini dayandırmaqdır, o zaman Aİ və Böyük Britaniyanın danışıqlarda iştirakı artıq mənasızdır və heç bir aktuallıq daşımır.
Xatırladaq ki, İranın nüvə proqramı ilə bağlı danışıqlar son illərdə dəfələrlə dayandırılıb və tərəflər arasında qarşılıqlı ittihamlar fonunda vəziyyət daha da gərginləşib. Aİ-nin yeni rəhbərliyi isə Tehranla diplomatik təmasları yenidən canlandırmağa çalışır. Lakin İran rəsmiləri danışıqlarda birtərəfli yanaşmanı qəbul etməyəcəklərini bildirirlər.
Fatimə Nəbiyeva
19:02 03.07.2025
Oxunuş sayı: 596
