Qantas kiber hücuma məruz qaldı: 6 milyon müştərinin məlumatları oğurlana bilər
Avstraliyanın “Qantas” aviaşirkəti kibercinayətkarların hücumuna məruz qalıb. Şirkət bildirib ki, hücum nəticəsində 6 milyon müştərinin şəxsi məlumatları ələ keçirilə bilər və oğurlanan məlumatların həcminin “əhəmiyyətli” olduğu ehtimal olunur.
Crossmedia.az xəbər verir ki, bu barədə CNN məlumat verib.
Qantas-ın çərşənbə günü yaydığı açıqlamaya görə, hücum əlaqə mərkəzində istifadə olunan üçüncü tərəf müştəri xidmətləri platforması vasitəsilə həyata keçirilib. Həmin platformada müştərilərə aid ad, e-poçt ünvanı, telefon nömrəsi, doğum tarixi və tez-tez uçan sərnişin nömrələri kimi məlumatlar mövcuddur.
Şirkət qeyd edib ki, platformada kredit kartı, maliyyə və pasport məlumatları yer almayıb.
Qantas sistemdə qeyri-adi fəallıq aşkar etdikdən sonra dərhal tədbir görərək hücumun qarşısını aldığını və hazırda bütün sistemlərin təhlükəsiz olduğunu bildirib. Hücumun şirkətin əməliyyatlarına və uçuş təhlükəsizliyinə təsir etmədiyi vurğulanıb.
Hadisə ilə bağlı Avstraliya Kibertəhlükəsizlik Mərkəzi, Federal Polis və müstəqil ekspertlərlə birgə araşdırma aparılır. Qantas rəhbərliyi zərərçəkən müştərilərlə əlaqə saxlanıldığını və onlara dəstək göstərildiyini açıqlayıb.
Şirkətin baş direktoru Vanessa Hudson bildirib: “Müştərilərimizdən üzr istəyirik və onların narahatlığını başa düşürük. Onların şəxsi məlumatlarına sahib çıxmaq bizim üçün ciddi məsuliyyətdir.”
Son illərdə Avstraliyada bir sıra böyük kiberhücumlar qeydə alınıb. Xatırladaq ki, 2022-ci ildə Medibank sığorta şirkətinə edilən hücum nəticəsində 9.7 milyon müştərinin həssas məlumatları oğurlanmış və “dark web”də yayımlanmışdı.
Nigar Rəhimova
14:55 02.07.2025
Oxunuş sayı: 749
