Ukraynadan Rusiyanın İjevsk şəhərinə PUA hücumu: 3 ölü, 45 yaralı
Ukraynanın həyata keçirdiyi pilotsuz uçuş aparatı (PUA) hücumu nəticəsində Rusiyanın İjevsk şəhərində yerləşən hərbi zavodda 3 nəfər həlak olub, 45 nəfər isə yaralanıb. Rusiya rəsmilərinin məlumatına görə, yaralılardan 6-nın vəziyyəti ağırdır. Hücumdan sonra bölgədə fövqəladə vəziyyət elan edilib.
Crossmedia.az xarici mediaya istinadən bildirir ki, hücumun hədəfi “Kupol Elektromexaniki Zavodu” olub. Rusiya bu zavodda “Tor” və “Osa” hava hücumundan müdafiə sistemlərinin, eləcə də radarların və pilotsuz uçuş aparatlarının istehsal edildiyini bildirir. Ukrayna Təhlükəsizlik Xidmətinə (SBU) istinadən yayılan məlumata görə, zavod 1 300 km uzaqlıqdan göndərilən iki uzun mənzilli PUA ilə vurulub.
Sosial şəbəkələrdə yayılan videoda zavodun damında partlayış və ardınca qalxan tüstü görünür. Hücum nəticəsində İjevsk hava limanının fəaliyyəti müvəqqəti dayandırılıb, lakin bir neçə saat sonra yenidən bərpa olunub. Qeyd edək ki, bu, son yarım ildə zavoda edilən ikinci hücumdur. Noyabr ayındakı hücumda insan tələfatı qeydə alınmamışdı.
Ukrayna rəsmiləri bildirirlər ki, bu cür xüsusi əməliyyatlar Rusiyanın hərbi potensialını zəiflədir və arxa cəbhədə təhlükəsiz ərazilərin olmadığını göstərir. Hücum fonunda Rusiya da Ukraynaya qarşı genişmiqyaslı raket və PUA zərbələri endirib. Təkcə son günlərdə Kiyev və Lvov da daxil olmaqla ölkənin müxtəlif bölgələrinə 537 raket və dronla hücum edilib.
Hadisədən sonra Fransa Prezidenti Emmanuel Makron və Rusiya Prezidenti Vladimir Putin iki ildən sonra ilk dəfə telefonla danışıb. Makron Ukraynanın ərazi bütövlüyünə dəstəyini ifadə edib və sülh danışıqlarının vacibliyini vurğulayıb. Putin isə Qərb ölkələrinin Rusiyanın təhlükəsizlik maraqlarını illərlə nəzərə almadığını deyib və sülhün yalnız “yeni ərazi reallıqları” əsasında mümkün olduğunu bildirib.
Fatimə Nəbiyeva
04:04 02.07.2025
Oxunuş sayı: 979
