Putin və Makron İran və Ukrayna mövzusunda telefon danışığı aparıblar
Rusiya Prezidenti Vladimir Putin və Fransa Prezidenti Emmanuel Makron təxminən üç illik fasilədən sonra ilk dəfə telefonla danışıblar. Tərəflər əsasən İran-İsrail münaqişəsi və Ukraynadakı vəziyyəti müzakirə ediblər.
Crossmedia.az xarici mediaya istinadən bildirir ki, Kremlin yaydığı məlumata görə, danışıq “əhatəli və substantiv” olub. Bu, liderlər arasında 2022-ci ilin sentyabrından bəri ilk telefon əlaqəsi sayılır. Fransa prezidentinin ofisi bildirib ki, iki saat davam edən söhbət zamanı Makron Ukraynada atəşkəsin əldə olunması və danışıqların başlanması zərurətini vurğulayıb.
Kreml qeyd edib ki, Putin İranın nüvə enerjisindən dinc məqsədlərlə istifadə etmək hüququna hörmətlə yanaşılmasının vacibliyini vurğulayıb və Tehranın Nüvə Silahlarının Yayılmaması Müqaviləsi çərçivəsində öhdəliklərini yerinə yetirdiyini bildirib.
Fransa tərəfi isə Makronun İranın Atom Enerjisi üzrə Beynəlxalq Agentliklə (AEBA) tam əməkdaşlıq etməsinin vacibliyini qeyd etdiyini açıqlayıb. Xatırladaq ki, ötən ay İran parlamenti AEBA ilə əməkdaşlığın dayandırılması haqqında qanun layihəsini təsdiqləyib. Bu addım ABŞ və İsrailin İranın nüvə obyektlərini bombalamasından sonra atılıb. İran nüvə silahı əldə etməyə çalışdığı iddialarını təkzib edir.
Makron həmçinin İranın raket proqramı, regional fəaliyyəti və nüvə məsələsinin diplomatik yolla, davamlı və ciddi şəkildə həll olunmasının tərəfdarı olduğunu bildirib. Fransa və Rusiya BMT Təhlükəsizlik Şurasının daimi üzvləri kimi bu istiqamətdə əməkdaşlığı davam etdirməyə razılaşıblar.
Ukrayna məsələsinə toxunan Putin, Qərbin uzun müddət Rusiya təhlükəsizlik maraqlarını nəzərə almamasının münaqişəyə səbəb olduğunu bildirib. Onun sözlərinə görə, mümkün sülh razılaşması “əhatəli və uzunmüddətli xarakter daşımalı” və “yeni ərazi reallıqları” əsasında qurulmalıdır. Kreml qeyd edib ki, Putin Ukraynanın bəzi ərazilərinin Rusiya tərəfindən ilhaqını sülh prosesində nəzərə almağı zəruri sayır.
Makron isə Fransanın Ukraynanın suverenliyi və ərazi bütövlüyünə sarsılmaz dəstəyini bir daha ifadə edib. Fransa Prezidenti bildirib ki, Ukraynanın hansısa ərazi güzəştlərinə razı olub-olmaması barədə qərar yalnız Ukraynanın özünə məxsusdur.
Fransa liderinin ofisi bildirib ki, Makron və Putin gələcəkdə İran və Ukrayna mövzularında dialoqu davam etdirmək niyyətindədirlər. Onu da qeyd edək ki, Makron 2022-ci ilin fevralında Rusiyaya səfər edərək Putinə şəxsən görüşmüşdü. Lakin Ukraynada müharibənin başlanmasından sonra iki lider arasında əlaqələr dayandırılmışdı.
Fatimə Nəbiyeva
22:55 01.07.2025
Oxunuş sayı: 2014
