ABŞ Suriyaya qarşı sanksiyaları ləğv edir – Tramp sərəncam imzaladı
ABŞ prezidenti Donald Tramp Suriyaya qarşı tətbiq olunan bir sıra sanksiyaların ləğvi ilə bağlı sərəncam imzalayıb. Sərəncam bazar ertəsi axşam saatlarında imzalanıb və xüsusilə kimyəvi silahdan istifadəyə görə tətbiq edilən sanksiyaların aradan qaldırılmasını nəzərdə tutur.
Crossmedia.az xarici mediaya istinadən bildirir ki, Tramp bu qərarın ABŞ Konqresinə göndərildikdən 20 gün sonra qüvvəyə minəcəyini açıqlayıb. O, bəyan edib ki, Suriyanın kimyəvi silahdan istifadəsinə görə sanksiyaların aradan qaldırılması, bölgədə sabitliyin bərpası və regional diplomatik proseslərin sürətlənməsi ilə bağlıdır. Tramp Suriyanın İsraillə normallaşma istiqamətində addımlar atmağa davam etməsinin vacibliyini vurğulayıb. Onun sözlərinə görə, ABŞ Suriyanın uğur qazanmasını arzulayır, lakin bu, Amerikanın milli maraqları hesabına olmamalıdır.
ABŞ Maliyyə naziri Bessent də məsələ ilə bağlı açıqlama verib. O, bildirib ki, Suriya hökuməti həm daxildə, həm də qonşuları ilə barışıq şəraitində sabit dövlət qurmaq üçün konkret addımlar atmalıdır. Bessent əlavə edib ki, sanksiyaların ləğvi Suriyanın iqtisadiyyatını beynəlxalq ticarət sisteminə inteqrasiya etməyə və ölkənin infrastrukturunu yenidən qurmağa imkan verəcək.
Ağ Evdən verilən açıqlamada isə Trampın Suriyanın regional təhlükəsizliyə töhfə verməsi üçün konkret tələblərinin olduğu qeyd edilib. O, xüsusilə İŞİD-in nəzarətində olan, döyüşçülər, qadınlar və uşaqlar da daxil olmaqla 50 minə yaxın məhbusun saxlandığı mərkəzlərə nəzarətin təmin edilməsini istəyib.
Donald Tramp həmçinin Suriyada son altı ayda baş verən dəyişikliklərin mühüm rol oynadığını söyləyib. O, Əhməd aş-Şəaranın rəhbərlik etdiyi yeni Suriya hökumətinin müsbət addımlar atdığını bildirib. Tramp vurğulayıb ki, bu addım ABŞ-nin milli təhlükəsizlik və xarici siyasət hədəflərinə dəstək məqsədi daşıyır. Eyni zamanda, qeyd olunub ki, əgər Dövlət katibi sanksiyaların aradan qaldırılması üçün lazımi şərtlərin yerinə yetirilmədiyini müəyyən etsə, həmin sanksiyalar yenidən tətbiq olunacaq.
Fatimə Nəbiyeva
09:37 01.07.2025
Oxunuş sayı: 962
